Musica: Nando Browne lo biba den nos memoria pa semper

ORANJESTAD - Despues di a tuma nota di e fayecimento repentino di e conocido musico Nando Browne awe marduga, Stichting Musica a manda nan palabranan pa cu esaki. Segun Musica, Nando Browne lo biba den nos memoria pa semper 

Stichting Musica ta extende su profundo condolencia y palabranan di forsa y sosten na e famia, amigonan musical y ser kerinan di e gran artista local, Nando Browne. 

Nando Browne tabata conoci pa su forma di presenta masha energetico, su voz versatil cu tabata cubri diferente rango y genero e.o. soca, reggae, r&b, dancehall y tur otro estilo di musica Caribense. 

E noticia di su fayecimento a tuma e organisacion di sorpresa y sigur ta laga nos refleha riba e aporte grandi cu Nando Browne a duna na Carnaval di Aruba y na Aruba Caiso & Soca Monarch (antes conoci como Calypso & Roadmarch contest). Nando a participa na varios ocasion bou di e nomber "Mighty Breaka" y a sa di destaca como cantante, compositor, entertainer y simplemente un tremendo persona. Ademas di esaki, Nando a guia varios mucha y hoben den nan participacion na festivalnan infantil y hubenil cual sigur ta algo di aprecia. 

Un mucha homber humilde y respetuoso cu a lanta na San Nicolas a crece y bira un talento valioso pa nos Carnaval y mundo musical en general. Como integrante di diferente banda y agrupacion manera Basic One, Musical Time, Chupz Band, Chrome Band, Impak Band y colaboracion extenso cu varios artista y banda local y internacional manera Le Groove, Michael Lampe, Junior Tecla y te na final cu su mesun banda The Fyah Band na hermana isla Corsow, su legacia sigur lo sigi biba den nos comunidad y Caribe. 

Stichting Musica tambe kier a gradici Organisacion SMAC pa awe dedica e Jouve na nomber di Nando Browne, y na inicio di parada ta pidi tur banda musical y pueblo en general pa 1 minuut di silencio, nos di Stichting Musica board y su musiconan ta bisa Danki p’e reconocimento aki. 

Nos ta desea tambe tur bandanan un bon participacion y celebra bida y Jouve mane Nando Browne lo a desea. Su musica lo yega curason di tur hende atraves di boso nan.