Manifestacion contra abuso sexual di mucha otro siman

ORANJESTAD - Pa motibo di falta di cumplimento y promesanan bashi di parti di e.o. gobernantenan, 'Fundacion Lisette Gomes contra abuso sexual di mucha' ta tene un manifestacion diamars merdia. E fundado Lisette Gomes a mustra diabierna mainta den un conferencia di prensa, cu for di april aña pasa a tene un manifestacion na Parlamento y Bestuurskantoor cu nan preocupacion riba e tema di abuso sexual contra mucha, pero lamentablemente nada di loke a keda priminti, no a materialisa segun Gomes. 

CASO DI ABUSO A AUMENTA 

A haya mas caso di abuso mientrastanto segun Gomes, aunke cu nan no a bin dilanti pa motibo di privacidad. "Tin hopi caso cu ta yega ministerio publico y no ta bay corte. Y pa esey, nos ta bay entrega un manifiesto dia 21 di februari, diamars awor, pafo di ministerio publico" Gomes a bisa. E intencion ta pa entrega e manifiesto 3'or na procurador general Alexander van Dam. Un problema cu Gomes tin ta cu hopi di e casonan di abuso no ta yega corte mientras cu tin pruebanan medico suficiente cu por wordo uza pa persigui e 'criminal' den esaki. 

ARGUMENTO DI CORTE

Riba pregunta di NoticiaCla.com cu corte ta argumenta cu tin varios factor cu ta determina un sentencia, Gomes a bisa cu ela tuma nota di esey, pero cu ta lamenta esey. "Nan (hues) no ta mira e otro banda cu e victimanan cu eigenlijk ta haya e castigo asina di mas largo. Uzando e ultimo caso di pedofiel sentencia (Dos Santos) como ehempel, Gomes ta mustra cu a haya e persona ey atrapa 'mano en la masa', y ta puntra ta ki prueba mas mester (pa por duna un sentencia mas largo). "Anto e ora bo ta bay balansa esey cu 'su potret a sali entre otro, y cu e persona no tin educacion'. Esey no tin nada di haber cu educacion. Sea e ta un problema di alcohol, droga of problema mental cu bo tin, cu bo ta bay mishi cu un mucha menor di edad cu no ta algo normal" Gomes a sigui bisa. A mustra cu no ta descarta cu e grupo lo organisa un manifestacion tambe pa bay corte directamente y pidi reunion cu e huesnan. "Eynan nos lo wak kico e siguiente pasonan lo tuma". A mustra cu berdad ta na Parlamento pa cambia ley, pero cu nan no ta hayando atencion eynan.