Conocido personahe Ernst 'Enty' Giel a bay sosega

NOORD - Conocido personahe di Boegoeroei Ernst "Enty" Giel (58) a fayece awe marduga den su soño. E noticia a cay como un baño di awa frieu awe marduga ora cu den careda di 5'or e noticia a plama di su morto repentino. Enty, tabata un persona alegre, hopi popular den comunidad, y sigur pa su labornan incansabel den mundo di turismo, trahando pa hopi aña den Aruba Tourism Authority. Conoci como emhahador di Boegoeroei, e tabata gosa di un simpatia inmenso den comunidad. Biniendo di un famia grandi, tur tabatin e mesun encanto. Su yiunan Yxselle, Erny y Emilaine tabata su encanto y tambe conoci como hendenan super alegre semper. Y su casa Grace, un persona keto pero tambe hopi amabel. Asina cu e noticia a plama, rednan social a keda inunda cu mensahenan di condolencia, pero mas ainda di shock pa su baida repentino. NoticiaCla.com ta manda palabra di forsa pa su famia, casa Grace, yiunan Yxselle, Erny y Emilaine, y su rumannan y demas famia. Cu Enty sosega na paz.

REACCION ATA

Reaccion di CEO di Aruba Tourism Authority tabata hopi emocional. "Palabranan ta keda chikito y no ta yega pa expresa e sentimentonan di tristesa pa e famia di Enty, reflehando aki riba su famia na ATA tambe. Enty, semper yena cu energia y alegria! Esaki ta di experiencia propio; tur yamada, no ta importa ki ora/ki dia, Enty semper a mustra di ta cla pa bay! Ta manera nunca e no por bisa 'no'! Enty tabata un persona wise, cu hopi conocemento cu el a acumula di entre otro tantisimo anja trahando den turismo! Enty ta semper duna palabra di apoyo y a trata di para pa locual ta husto entre otro pa coleganan. E palabranan di apoyo mi a experencia personalmente, algo cu mi a balora mirando cu e trabou ta unu cu sigur no ta facil na tur momento. Enty tabata un persona cu ta lucha pa bai dilanti, pa entre otro su tesoronan, su famia! Esey tabata semper central pa Enty! Cu hopi orguyo e tabata papia semper di su nietonan y mi por a semper conclui cu e tabata hopi envolvi den nan bida. Tambe e tabata papia hopi biaha di su yuinan, su sra., su sra. mama, su tata ... enfin 'famia'. Mi ultimo conversacion cu Enty tabata siman pasa dialuna, nos a papia den gang meymey di reunionnan y djei ela compaña'mi den mi oficina ... ela expresa entre otro diferente puntonan cu por mehora riba area di turismo crucero como tambe papel cu e por hunga den yuda ATA cu su trabou di desaroyo di destino Aruba (producto Aruba). Enty, mi tabatatin e placer di a conocebo y di a traha cu bo for di 2011 - un etapa unda Enty a mustra su forza caba, enfrentando problemanan cu salud satisfactoriamente-. Nos a comparti hopi momento hunto, incluyendo e momento special di a cende e pagara na ATA aña pasa .... pa asina drenta 2017 riba bon pia! Mi / bo famia di ATA lo sinti bo falta Enty! E sector di turismo lo sinti bo falta! Nos a perde un shon di hende, uno cu a carga e nomber di Aruba y promocion di Aruba semper na halto! Condolencia y forsa! Enty sosega na paz!" Tjin Asjoe a finalisa bisando.