Resumen ultimo kwartaal 2016 di gobierno reparti e siman aki

ORANJESTAD – Parlamento di Aruba, e colegio di supervision CAft y demas instituto lo ricibi e resumen di e ultimo kwartaal di aña 2016 di gobierno e siman aki. Asina minister di Finanzas, Angel Bermudez a confirma den un comunicado.

Despues cu a cera buki di 2016 y a compila e informacion di e cifranan di administracion financiero, e departamento di Finanzas a produci e resumen aki. E mandatario a informa di ta hopi satisfecho cu e resumen y e resultado ya cu esaki ta demostra cu durante 2016 a logra ehecuta e presupuesto dentro di e liñanan, manera cu Parlamento a aproba y manera cu e ley di Laft ta stipula. 

E cifranan ta indica cu e deficit di 2016 ta na 2% di GDP, pues realisando esaki no ta cuestion di sigui cumpli cu e ley, pero na mes momento ta sigui cumpli cu e maneho di e ultimo añanan pa reduci e deficit di e presupuestonan structuralmente pa asina otro aña pais Aruba tin un presupuesto balansa y consecuentemente por sigui padilanti cu un presupuesto cu ‘surplus’.

Segun Bermudez, di e forma aki por cuminsa paga Aruba su debe nacional y asina cu baha e debe aki, lo sigui reduci e gastonan di interes anualmente tambe. E mandatario a sigui splica cu desde 2012 a bin ta reduci e deficit, unda cu a cuminsa na 8,2% y den e transcurso di e añanan siguiente a logra baha e deficit tur aña segun e maneho stipula pa Gobierno.

Pa aña 2015, mester a mantene e deficit den e margen di 3.7%, sin embargo a logra reduci esaki te na 2% di GDP. Pa loke ta aña pasa, e norma stipula tabata di 2% y e resumen a indica cu a logra mantene esaki y finalmente esun di e aña aki mes lo ta 0.5% di GDP.

“E ta un encargo basta grandi, pero tur aña eingelijk nos a logra rebaha e deficit aki. E ta un trabou hopi intensivo paso di un banda bo mester maneha, coordina y domina bo gastonan dentro di e cuadro financiero manera cu e ta aproba y di otro banda bo mester zorg pa bo realisa bo entradanan tambe”, asina e mandatario a indica.

Bermudez ta enfatisa cu e tarea aki ta un esfuerso total di e tur e departamentonan concerni, pero cu e ta un logra tambe danki na e cumplimento di nos comunidad. “Mas nos comunidad cumpli cu nan obligacionnan, mas miho bo ta wak cu nos presupuesto ta wordo realisa. Esaki ta significa cu e ora bo no mester implementa niun aumento di tarifa, of impuesto nobo y esey ta basicamente e idea y logro grandi di e ultimo añanan”.