Situacion cu douaneronan tabata 'mision imposibel'

ORANJESTAD - Director di aeropuerto James Fazio no ta contento con cos a cana recientemente cu e proyecto di infrastructura di e.o. douane. Esey a pone cu a dicidi di para e proyecto su continuacion cu ta nifica un perdida di por lo menos 800 mil florin. Tur pasobra douaneronan no kier coopera cu e proyecto manera stipula. Tur loke cu Fazio kier a logra, segun e mes a splica NoticiaCla.com ta haci e area e.o. mas eficiente y mas productivo. 

AREA NO UTILISA

Segun Fazio, a nota cu tabatin un area no utilisa unda cu douane ta efectua nan control (douane ta usa solamente 10%), y kier a haci esaki mas productivo. Tambe ta conoci cu douane tin un personal limita di p.e. 5 hende atardi. "Nos kier a traha un plan hunto cu douane y gerencia unda cu tabata haci uzo mas eficiente y uza e 5 douaneronan mas eficiente y duna nan bon instrument pa nan por ta mas efectivo durante nan control na frontera. "Nos ta reconoce cu douane tin un tarea hopi importante" Fazio a sigui bisa. "Tabata tempo pa haci algo miho pa nan. Como tal a planea pa re-desaroya 60% di e espacio. 

CAR RENTAL

Ademas tabatin un asunto di carrentalnan cu tabata opera den un forma no corecto. "Bo tin e hendenan ilegal aki ta hussle pasahero otro banda di caminda. E no ta mustra bon pa aeropuerto, e ta laga un impresion malo pa turista" Fazio a bisa. Ta trata di carrentals cu no tin un booth pafo di aeropuerto. "Tin di nan cu no ta ni carrentals legitimo. Nos no sa. Y nos ta haya hopi critica di e 10 carrental cu ta opera na aeropuerto, riba e actividad aki" Fazio a continua bisando. Y no tabata exitoso pa remedia e situacion aki. Como tal a pensa pa soluciona esaki door di duna e carrentalnan aki un tipo di counter den e area di maleta, cu tabata e intencion original. "Mientras cu e pasaheronan ta warda nan maleta, nan por haci nan papeleo di carrental, y pa ora cu nan ricibi nan maleta, nan ta cla". E ta un area (transporte terestre) unda cu aeropuerto no ta score mucho bon. Y como tal esey tabata un chens pa logra esaki. 

CONSESION HACI

Pa por a logra tur esaki, Fazio ta admiti cu mester a haci cierto consesion cu nan (aeropuerto) no tabata mucho contento cu ne, manera laga e boothnan afo. "Douane tabatin problema cu e boothnan y nos a pone un muraya rond di e area pa pasahero mester a pasa door di douane prome y despues bay e carrental. Nos no ta contento cu esey pero nos a concedi. Nos a kere cu esey lo tabata un plan positivo pa ambos partido" Fazio a bisa. Sinembargo a resulta cu e ultimo lunanan, cu un situacion di win-win cu douane, lo no bira un realidad. 

PAZ ENTRE DOUANE Y AEROPUERTO

E percepcion cu douane recientemente lo a yega na un acuerdo cu aeropuerto despues di un accion, no ta corecto. "Esey no ta exactamente corecto" Fazio a sigura e portal aki. Loke, segun e CEO, a pasa ta cu tin algun plan cu a wordo tira bek pa aeropeurto, pero nan ta falso, no ta factibel. "Tin un area chikito cu nan ta dispuesto pa compromete cu ne pa duna carrentals, pero pa e CEO, esaki ta mucho chikito. E no ta funciona, pues nos no ta bay sigui gasta placa riba un plan cu no ta funciona" Fazio a sigui bisa. E ta hopi desapunta riba e situacion.

STROBA TRABOU DI CONSTRUCCION

Loke Fazio no ta contento cu ne ta cu ora cu a cuminsa cu e construccion, algun individuo di douane, a dicidi riba nan mes pa haci control 100% di pasahero, y esaki tabata sosode pa varios ora segun Fazio. "Subsecuentemente tabatin 350 pa 400 pasahero den e area di maleta cu mester a warda 2 ora pa sali for di e area ey. Un anciano a colapse y mester a haya asistencia medico. Varios pasahero a rabia y bisa cu nan no ta bolbe Aruba nunca mas" Fazio a sigui bisa. "Nos ta confronta cu un situacion cu cierto individuo di douane ta actua, sin informacion di inteligencia, sin autorisacion di nan supervisor, tampoco di gerencia, pa straf centenares di pasahero inocente, como represaya contra e inversion di aeropuerto purbando di converti e area di nan y haci nan trabou mas facil y duna nan un ambiente di trabou miho" e CEO a sigui bisa. Pues como tal e situacion cu douane a bira un 'mision imposibel'. Y den e lunanan cu a sigui, a reuni constantemente, tabatin retraso constante. "Nos ta na e punto awor cu e proyecto no ta bale la pena mas. Nos no ta continua cu e parti dos di e proyecto" CEO a bisa, splicando cu lo tin un structura cu toch por funciona miho, pero no manera cu tabata planea. Scucha e entrevista completo AKI.