Homber 'pedofiel' Rafael D. condena na 42 luna di prison

ORANJESTAD - Hues a sentencia e sospechoso Rafael Dos Santos, conoci den comunidad como e homber pedofiel 'sunu', na 42 luna di castigo di prizon. Esaki ta e homber cu polis a haya completamente sunu den un auto, cu un condon colga na su parti intimo, cla pa haci acto sexual cu un mucha muher menor di edad. Hues a mustra proba cu tabatin un intento di violacion y tene relacion sexual cu un mucha muher di 15 aña. E sospechoso tabata un conoci di e victima. Segun corte e victima a wordo saca prome cu tempo for di man di e sospechoso, cu tabata preparando pa viola e victima den su auto. E sospechoso, despues cu polis a yega na e auto, a purba huy cu e auto y e victima pero finalmente a wordo deteni. 

Hues a considera cu esaki mester tabata momentonan di hopi angustia pa e victima y cu a causa un consternacion grandi den comunidad. E sospechoso den pasado caba, ora cu e victima tabatin 13 aña di edad, a haci su mes culpabel na actonan di violacion cu e mucha muher. E sospechoso a, abusando di confiansa cu e victima a pone den dje y abusando di e poder cu e tabatin riba e victima, como adulto, a seriamente viola su integridad fisico. E victima tabata, considerando su edad, ambos biaha den un posicion hopi vulnerabel. Actuando den forma comproba, e sospechoso tabatin bista solamente riba su necesidad sexual, y no a tene cuenta cu e daño cu e por a causa e victima. Hues den su condena, a tene cuenta cu e sospechoso no tin antecedente penal. Ademas a pisa tambe cu e sospechoso despues di su detencion, a wordo expone publicamente pa prensa. E psicologo cu a atende e persona a raporta berdad cu e sospechoso no por rasona, pero esey si hues no a considera den su condena, awor cu e resultado di e pruebanan haci, no ta consistente y e supuesto falta di desaroyo di su estado mental, no ta influencia e comportacion di e sospechoso, cu lo a impedi su actuacion. E castigo ta conforme e exigencia di fiscal.