Aeropuerto a inaugura 'Airport Arrival Enhancement Project'

ORANJESTAD – E area di yegada di imigracion renoba na aeropuerto a keda inaugura diaranson mainta. “E proyecto ta un bon ehempel di teamwork y partnership excepcional; Planning y ehecucion di un proyecto grandi di renobacion den nos area di imigracion, unda cu tur pasahero cu ta yega mester pasa door di dje no tabata un trabou facil. Pero nos a logra,” CEO di AAA James Fazio a bisa durante su discurso na e ceremonia.

ACTITUD NOS PORT

Segun Fazio e proyecto aki a wordo completa cu un actitud “nos-port” for di e comunidad di aeropuerto completo. Vloer nobo di terrazzo, rampa di transicion pa area di  baggage claim, booth nobo di inspeccion, re-organisacion di e-gates, tur a contribui na un mihor ambiente den e area y como toke final, varios obra di arte for di artista local Luis Alfonso Castano cu ta hacie imposibel pa no nota cu ta na Aruba bo a yega. 

INVERSION MIYONARIO 

E inversion total den e proyecto di e area di yegada y e renobacionnan recien na e area di salida di IASA ta yega na un total di mas cu 2 miyon florin. AAA ta kere cu e inversionnan aki ta na nan lugar – y ta duna e ekipo di servicio y operacion di imigracion mihor herment pa maneha e fluho di pasahero y mehora e seguridad di frontera. “Nos aeropuerto ta e prome y ultimo impresion di nos isla, y mas cu 1 miyon pasahero ta pasa door di e area aki tur anja, y sin duda, e cifra ei lo sigui crese den e anjanan nos dilanti, y nos ta hopi orguyoso di loke a wordo logra aki,” Fazio a sigui bisa. 

E ekipo di IASA  desde september mester a traha cu 1/3 di e area di imigracion cera pa motibo di construccion, cu stof, pasaheronan cu mester a pasa via un otro ruta y un inconvenencia general cu ta bini cu e construccion di un proyecto di e magnitud aki -  y door di full e proceso aki nan a percura pa mantene e operacionnan sin stop, cu un bon actitud, sin keha y a yuda aeropuerto finalisa e Airport Arrival Enhancement Project. Pa esey Fazzio a manda palabra di gradicimento.