Minister : Bishita Republica Dominicana pa atrae inversionista pa San Nicolas

ORANJESTAD - Reunionnan cu posibel desaroyadornan di proyectonan importante pa San Nicolas, ta e motibo di bishita di dos minister di Aruba e fin di siman aki pa Republica Dominicano. Riba insistencia di NoticiaCla.com, minister Otmar Oduber a confirma cu e motibo di su bishita, hunto cu colega de Meza ta pa papia cu hendenan cu kier inverti den San Nicolas. Mientras cu no kier a confirma si ta trata di desaroyadornan di un hotel nobo, e mandatario a bisa solamente “nos ta bay reuni cu inversionistanan potencial”. Informacion cu NoticiaCla.com tin, ta cu ta trata di desaroyadornan di hotel, cu lo ta interesa pa cuminsa un tipo di hotel na San Nicolas.

E siman cu a pasa, minister de Meza a laga los den forma di ‘code’ cu pronto e lo por anuncia algo grandi pa San Nicolas. Pero e no por a bisa kico exactamente. Pues esaki ta e loke e tabata referi na dje, esta e bishita na Republica Dominicano pa wak si por atrae e inversionistanan aki pa bin Aruba e inverti particularmente na San Nicolas. Manera ta conoci, San Nicolas a bira un cabay di campaña pa hopi partido ultimo eleccionnan, y den esaki, partido AVP no tabata un excepcion. Segun de Meza durante un conferencia recien, AVP ta e unico partido cu a haci asina hopi pa San Nicolas. E la reta tur hende pa puntra hendenan den San Nicolas, si esaki no ta berdad.

Otro partidonan ta diferencia di opinion riba e topico aki. Recientemente San Nicolas Business Association den un carta publico, a cuestiona e rapidez cu e gobierno aki ta hibando su ‘maneho’, ya cu e promesa pa duna incentivo pa San Nicolas, ainda no a materialisa. Di otro banda, SNBA a mustra cu nan ta sostene gobierno di tur forma, y a bay asina lew di firma e protocol di AZV recientemente. Partido di oposicion ta mustra cu nada no a wordo haci, y cu tin mas lugar bashi cu yen. Riba esaki gobierno actual a mustra cu berdad tin lugarnan bashi, pero esaki no ta di awo, pero di mas di 10 aña. Pues e discusion riba prosperidad di San Nicolas ta keda un discusion.