Van der Poel: 'Sentencia ta sigui sigura remedi pa e pashent'

ORANJESTAD - "Cu e sentencia di dialuna (VIPPA vs inspector di remedi), e pashent ta sigura cu semper su botica por provee e remedi necesario". Asina e gerente general di e cadena 'Botica di Servicio' Lennert van der Poel a sigura NoticiaCla.com awe mainta. Den e sentencia di ayera, hues a duna e inspector di remedi (y boticanan consecuentemente) rason cu e por sigui duna permiso temporal na boticanan pa importa remedi si e importadonan no por provee esaki. 

BURACO DEN PROCESO PA IMPORTA REMEDI

"E importadornan ta crea buraco(nan) den e proceso di importa remedi, y ta na e boticanan pa yena e buraco(nan) aki. Algo cu e asociacion di imporador (VIPPA) kier a prohibi" van der Poel a sigui bisa. "Danki Dios cu hues no a duna oido na e peticion aki". Segun e gerente general, hues a mustra cu e peticion di VIPPA ta 'absurdo' y cu 'ta bay pa e pashent', y cu boticanan ta liber pa entre nan provee remedi'  van der Poel a continua bisando. 

FRECUENCIA DI FALTA DI REMEDI TA HALTO

Van der Poel a mustra cu e frecuencia cu cual un situacion ta surgi di 'escases' di remedi ta hopi. Durante e caso a bin dilanti cu den 2017 ya caba 67 biaha a sosode cu no tabatin remedi den stock door di un importado local di remedi. Y nos ta apenas den e di 6 siman di e aña aki. "Pues bo por conclui cuanto biaha den un aña e situacion aki ta ocuri. E contesta ta pues, regularmente". 

BOTICANAN TA TRAHA PREVENTIVO

Boticanan ta purba traha mas preventivo posibel, unda cu nan ta purba busca e remedi prome cu esaki caba. "Pero ta sosode cu nos sa busca un remedi, pero ta haya sa apenas e dia despues cu e remedi no ta disponibel". Esey ta pone, segun van der Poel, cu e botica(nan) e ora ey numa por cuminsa e proceso di busca un remedi, cu ta inclui e peticion na inspector di remedi pa importa e remedi. "Esey ta nifica den practica cu un pashent tin cu warda tin biaha dos siman riba un remedi particular" van der Poel a sigui bisa.   

PASHENT A MURI PA FALTA DI REMEDI? 

"Danki Dios cu ainda por a logra haya remedi via hospital, cu ta pone cu e menasa di perde bida no a sosode ainda. Esey lo ta un locura. E ta fastioso y no apropia pero te ainda Danki Dios cu esey no a sosode ainda". Mes momento sinembargo, e ta haya increibel cu den e caso aki, e abogado di e asociacion a remarca na hues cu 'no tin problema' pasobra 'ainda ningun hende a muri pa falta di medicina'. 

LEY TA ANTICUA

E ley actual riba e tereno di importacion, ta anticua. "Tur partido tin necesidad pa un maneho di inspector. E ley ta anticua, y fuera di e hecho cu e ley ta 'preto riba blanco', e no ta detaya con tin cu traha". Tin un comision actualmente cu tur protagonista cu tin cu indica e maneho cu mester tin pa salvaguardia cu tur remedi semper ta den stock na Aruba. "Nos como botica no ta interesa pa ta un importado mayoritario, pero nos ta interesa pa provee nos pashentnan cu ta inscribi cerca nos, di e miho forma posibel. Esey ta nos unico meta" segun van der Poel. Ademas e kier yuda tur otro botica colega for di nan situacion si nan tin escases di cierto remedi. 

BOTICA DI SERVICIO E UNICO CU TA OPERA ASINA?

Den corte, aunke cu e asociacion a hala atencion constante di e cadena di botica di cual van der Poel ta maneha, esta Botica di Servicio como si fuera cu nan ta e unico cu sa importa, esey no ta e caso. Den sentencianan anterior a haci mencion di botica cu nomber y fam door di VIPPA, como si fuera cu nan tabata esunnan cu tabata practica algo 'ilegal' cu importacion di remedi segun van der Poel. "Hues a bisa den dos instancia caba cu esey no ta e caso. Nos no ta haci nada cu ta ilegal" e gerente a bisa finalmente. Ela confima cu tur botica ta provee importacion propio ora cu mester. Loke cu van der Poel ta kere, ta cu como cu su organisacion ta bon organisa y ta presta un servicio bon, cu e bista ta cay riba nan automaticamente. "Nos ta inverti hopi placa den nos operacion pa asina nos por provee pa nos pashentenan. Porta nos ta haci'e e importacion mas frecuente cu otro botica," e gerente ta finalisa bisando, cu ta crea e impresion cu ta nan so ta haci esaki. NoticiaCla.com a busca reaccion di e abogado contrario, pero no a logra ainda.