No a re - registra avionnan geground di InselAir Aruba

ORANJESTAD - InselAir Aruba no a re registra su avionnan pa InselAir na Corsou. Por lo menos, no ainda. Asina fuentenan di direccion aviacion civil na Aruba a sigura NoticiaCla.com diamars. "E no ta cuadra" e fuente a sigui bisa riba e declaracionan cu ya caba e re registracion ta un hecho. A mustra cu tin combersacionan si andando pa esaki sosode. De hecho, a mustra cu no ta algo straño cu kier haci esaki. Si esaki sosode, ta papiando di posiblemente 2 of 3 di e 7 avionnan di e flota di Aruba. Esey lo yuda InselAir International (Corsou) cu nan itinerario. Mientrastanto e fuente a confirma cu e 4 avionnan cu nan a ground, ainda ta geground y no tin cambio riba esey. 

DECLARACION DI CORSOU

Declaracionnan di ehecutivonan di InselAir international ta confirma e ponencia di fuentenan di e portal aki.  Entre nan e ehecutivo Juni Sluis a declara na Telenoticia di Corsou cu e intencion ta pa re registra algun avion di Aruba y asina haya e flota pa por efectua buelonan mas miho y asina drecha e imagen di e aeroliña. A sigura cu e ultimo siman y mey cos tabata bayendo bon te ora cu e avion fokker a daña na Colombia, dañando henter e situacion atrobe. A confirma mientrastanto tambe cu e jetlease di varios avionnan di otro compania ta costando e aeroliña un capital. Y como tal kier deshaci di e situacion ey mas liher cu ta posibel. Sinembargo no por a duna un fecha ki dia e situacion ta stabilisa, ki dia e avionnan di InselAir ta wordo laga liber y mas.