Fechanan crucial relaciona cu eleccion nobo Parlamentario di Corsou ta conoci

WILLEMSTAD - Conseho supremo electoral na Corsou a cuminsa cu e proceso pa prepara pa eleccion parlamentario pa 28 di april 2017. Mientrastanto cu Gobernador George Wout a firma e decreto, e fecha pa e proximo procesonan a bira conoci tambe relaciona cu eleccion. Fuera di e fecha di eleccion, tin e fecha riba cual candidatonan mester ta conoci, cu ta 10 di maart. Ademas e fecha cu ta huramenta e Parlamento nobo, cu ta 11 di mei proximo. Esey ta nifica tambe cu e Parlamento actual ta keda disolve riba e fecha ey. Tur esaki ta conforme articulonan 53, 14 lid 2, y articulo 37 lid 2 di Staatsregeling.

ELECCION NOBO

Manera ta conoci, riba proposicion di prome minister Hensley Koeiman, Gobernador a bay di acuerdo cu e retiro di e gabinete Koeiman y pa disolve parlamento y yama eleccion parlamentario nobo. Esaki despues cu e gabinete a perde sosten di partido Pueblo Soberano den fin di siman. Gobernador a opta pa no acepta e proposicion di oposicion cu a presenta un documento cu firma di 11 parlamentario cla pa forma e proximo gobierno. A opta pa e otro opcion cu ta esun di Koeiman. Cu esey, ta yama e eleccion pa dia 28 di april proximo, despues di apenas 5 luna cu Corsou a conoce su ultimo eleccion parlamentario y apenas 7 siman despues cu gabinete Koeiman a huramenta dilanti e Gobernador.