Apertura acelera RIU debi na problema inicial cu trahado

ORANJESTAD - Complicacionnan inicial a pone cu e hotel a opta pa acelera e proceso di renobacion di ex Westin pa Riu Palace Antillas. “Nos tabata haya hopi problema pa haya permiso di gobierno, pues nos mester a traha cu e hendenan cu nos tabatin. Un di e forma tabata pa laga nan traha oranan mas largo” gerente general di e hotel Richard Velazco a confirma na NoticiaCla.com. Esey ta nifica cu tin biaha e trahadonan tabata traha te 2 or di marduga.

Mientrastanto, e hotel ta kedando cla pa ricibi e prome huespednan dia 11 di october proximo. Ora cu e hotel habri, nan lo a emplea un total di 450 trahado atrobe. E gerente sinembargo no ta compronde con ta papia di e cantidad di 500 pa 600 trahado. E trahadonan tur ta hendenan local segun e gerente a confirma na NoticiaCla.com. E hotel a cuminsa cu e proceso di adkiri e trahadonan ‘nobo’ dialuna ultimo y ta den proceso pa ubica e personal necesario pa por keda cla y tin nan staff completo pa ora cu nan habri e portanan proximamente. Mester corda cu tin cu entrena mayoria di e staf den e ‘nivel di Riu’. Esnan cu a haya un pakete di retiro di Westin, lo haya un chens prome, pero esey no kier men cu nan ta wordo tuma automaticamente. “Nan lo wordo considera prome, cu otronan cu bin” Velazco a bisa. Tin un lista di hende cu lo ta riba dje cu ta di e grupo ey. Banda di esey bo tin esun cu ta bin for di caya, cu tin experiencia pero cu no a traha na Westin. “Bo lo por haya tur dos tipo cu lo por wordo tuma na trabou”.

Un di e mencionan cu NoticiaCla.com a haci e siman aki riba e propiedad, ta cu tin un brug cu ta conecta e dos hotelnan aki cu otro. Segun Velazco, mientras cu nan a traha un brug, e dos propiedadnan ta separa for di otro den varios aspecto. Esun mas importante porta, ta e hecho cu e hotel nobo ta ‘solamente pa adulto’. Y pa un hende no bay pensa malo, tur loke e ta nifica, ta cu e hotel no ta ‘acepta’ mucha. Pues no ta bay mira mucha coriendo rond den e propiedad ey. Pero e brug, ta facilita e adultonan di pasa di un hotel pa e otro di un manera mas facil.

NoticiaCla.com a pone varios potret di e loke e hotel nobo lo ta di paden y pafo, y ey por a nota cu e hotel ta mucho mas ‘moderno’ cu esun actual. “E colornan den e comedornan ta bay ta completamente diferente. Tin un discoteque den Palace Antillas, cual no tin den e otro Palace. Esey ta basicamente e cambionan cu bo lo wak segun e gerente general. Pa loke ta gerente, Carlos Sepulvera lo maneha e propiedad nobo, mientras cu Richard Velazco lo keda maneha Palace Aruba.