Union Europeo ta yuda financia establecimento Parke Marino di Aruba

ORANJESTAD - Union Europeo a otorga e fondonan hopi necesario pa e establecimento di e Parke Marino Aruba y e desaroyo di plannan di maneho pa cuater area elemental pa biodiversidad. Asina nan ta informa pa medio di un comunicado. E obhetivo di e esfuerso aki ta pa proteha y restaura e sistemanan ecologico di costa, servicionan di sistemanan ecologico, biodiversidad y procesonan ecologico, y proteha e areanan di varios impacto negativo.

E fondonan ta bin for di e ‘B.E.S.T. 2.0,  un programa di conservacion pa biodiversidad pa cual a aloca un total di ocho miyon euro pa Paisnan y Teritorionan Europeo Ultramar (OCTA). E facilidad di fondo aki, sosteni pa Comision Europeo (DG DEVCO), ta parti di insigna principal B4Life, cu ta para pa Biodiversidad pa Bida di Union Europeo. E proyecto aki tin como obhetivo pa conserva biodiversidad y uzo sostenibel di servicionan di ecosistema, incluso acercamentonan basa riba ecosistema pa adaptacion di cambio di clima, ademas di mitigacion, como base di desaroyo sostenibel den e Paisnan y Teritorionan Europeo Ultramar.

Directie Natuur en Milieu, DNM, esta e departamento pa naturalesa y medio ambiente lo implementa e proyecto aki conhuntamente cu TNO. E ta inclui e desaroyo di legislacion pa establece y maneha e Parke Marino, e desaroyo di plannan di maneho pa cuater Area di Biodiversidad Elemental y establecimento di un organizacion pa maneha e Parke Marino. Lo tin varios oportunidad pa envolvimento di publico durante e proceso y e ekipo encarga cu e proyecto pro-activamente lo drenta den contacto cu tur actor relevante, manera operadonan turistico, piscadonan, y organisacionnan ambiental.

Segun Gisbert Boekhoudt, Director DNM: “E proyecto aki lo permiti nos pa pro-activamente proteha e recursonan marino di Aruba y reforsa nos asociacion cu organizacionnan ambiental local y regional cu esfuerso adicional pa atrae fondonan futuro y financiadonan pa yuda nos proteha y restaura e recursonan marino di Aruba.”

Di su banda, Director di TNO Caribbean Jan Ebbing, a bisa cu “TNO ta orguyoso di ta e partner di Aruba como e instancia cu a ricibi e fondo pa implementa e proyecto importante aki. Maneho sustenibel di recursonan marino ta di importancia grandi pa futuro economico di Aruba y ta un aspecto integral di desaroyo sostenibel isleño. E fondonan di Union Europeo lo accelera e proyecto.” Pa mas informacion riba e BEST 2.0 program bishita: https://portals.iucn.org/best/