No ta prohibi botica(nan) importa remedi ora mester

ORANJESTAD - Boticanan por sigui importa remedi ora cu nan tin permiso pa haci tal den caso cu e importadonan di remedi no por suministra esaki. Pa di dos biaha e asociacion di importado di remedi (VIPPA) a hiba inspector di remedi (y un botica en particular esta Botica di Servicio) corte di LAR pa prohibi botica(nan) di importa remedi nan mes. Y si nan haci esey toch, mester impone un multa di 250.000 florin pa cada biaha cu nan viola e regla aki. Hues sinembargo a rechasa e demanda y dicta cu botica(nan) por sigui importa ora cu ta necesario. 

ARGUMENTO DI VIPPA

E asociacion di importado di remedi a mustra cu ta solamente ora cu tin remedi cu nan no tin of por a haya, cu e botica(nan) por importa esaki, y e ora si solamente pa e respectivo botica y pa e cantidad cu e botica normalmente ta bende. Pero no por ta asina cu e botica ta actua como un importado, y pio ainda, bende cu otro botica tambe. P'esey a pidi hues pa impone e prohibicion. 

BOTICANAN TIN PERMISO

Segun inspector di remedi, ley claramente ta duna e botica(nan) e posibilidad pa importa remedi ora cu e importadonan no por haci esaki of no tin den stock. Tambe, e ley no ta prohibi e boticanan di bende esaki cu otro botica ora cu nan a caba importa e remedi. De hecho, esaki ta sosode solamente ora cu e respectivo boticanan pidi y haya e permiso temporal pa haci esaki tambe. Pues no tin motibo di tin problema den e caso aki. 

HUES

Hues den e caso aki a mustra cu e peticion cu VIPPA ta haci, ta bay mucho leu y cu no ta mira un problema pa boticanan importa e remedi. Ademas un cambio di maneho riba e tema ainda no ta cla, manera cu a wordo informa. Como tal a rechasa e demanda di e asociacion. Lesa e veredicto AKI.