Aruba cu tipo di control di entrada manera ESTA

ORANJESTAD - Si tur cos cana manera mester, aki tres luna Aruba lo por introduci un tipo di control pa stranhero drenta Aruba, manera cu e sistema Mericano di ESTA (Electronic System for Travel Authorization) ta funciona. Asina e mandatario responsabel pa imigracion, Arthur Dowers a informa prensa. E siman aki mes lo firma e contracto cu desaroyadornan di e proyecto pa cuminsa traha riba dje. Unabes cu introduci esaki (pa tur bishitante incluyendo Mericano), lo tin un miho control di ken tur ta drenta of kier drenta Aruba. Solamente ciudadanonan di Reino Hulandes no mester yena e formulario aki. Claro, cu lo tin un introduccion 'suave' pa por custumbra cu ne. E tecnologia ta algo manera e asina yama ED card aunke e implementacion y e operacion ta algo totalmente diferente. 

CAMBIO DEN LEY

Pa por introduci e cambio aki, mester adapta ley tambe pa cual tin trabou ta haciendo aworaki caba. Segun e mandatario, ta solamente cuestion di mand'ele parlamento pa por keda cla. Pero e parti tecnico ta e parti mas importante cu falta. Lo evalua e asina yama ED Card pasobra esey no a duna e resultado cu a spera pa loke ta registracion di pasahero cu ta bin Aruba. E formulario ta duna informacion, pero no por para un bishitante di drenta nos isla, a base di e formulario ey. "Cu e sistema nobo, ta bay screen bo vooraf, y si bo ta indesea bo no ta yega akinan" Dowers a bisa.