Fraude na Dept. Enseñansa a dura di Augustus 2010 pa July 2014

ORANJESTAD - Durante un periodo di cuater aña, e dos empleadonan di departamento di enseñansa cu a cay sera recientemente, a comete nan actonan illegal. Pa prome biaha Ministerio Publico ta confirma e periodo durante cual e personanan aki tabata activo. Ta trata di Augustus 2010 pa July di 2014 cu tanto sospechoso T y Q a ‘disparce’ un suma di casi 1 miyon florin na placa. Mes momento Ministerio Publico pa prome biaha por confirma cu tin mas detencion na caminda. Algo cu nan no tabata confortable ainda pa divulga. Pero esaki a sosode si na NoticiaCla.com diaranson.

Mientrastanto e dos sospechosonan di fraude na departamento di enseñansa ta keto bay deteni y no ta sali pa awo. Segun vocero di ministerio publico Ann Angela, T cu a wordo deteni prome, ta den ‘gevangen houding’ y e otro, e detenido Q, cu ta e di dos, ta drentando e fase di ‘gevangen houding’ awor. Tambe a confirma cu e investigacion ta andando y landsrecherche ta ocupa cu e analisis di e material di prueba. E diferencia di e dos detencionnan ta simplemente un par di dia. “Prome a detene T, y despues a detene Q. Pues T ta cana dilanti den e fase di detencion y ambos ta detene na KIA.

E prome detenido ta sera awor pa un periodo maximo di 60 dia, pero e tin e abogado cu tin e chens pa apela esaki. E otro ta drenta e fase di 60 dia, dia 1 di september proximo. “Pues por lo pronto nan ta deteni. E cargonan ta keda igual y ta falsificacion di firma ,labamento di placa y estafa. E montante di placa enberdad a aumenta di 750.000 florin cu lo a wordo frauda, a aumenta te 1 miyon florin awor. Algo cu inicialmente Ministerio Publico no kier a bay mucho aden. “Awor nos tambe ta den e direccion ey” e vocero di Ministerio Publico, Ann Angela a confirma na NoticiaCla.com. Motibo di e cambio ta e hecho cu e investigacion a avansa y a duna indicacion cu e placa cu ta envolvi, ta mucho mas cu inicialmente a kere.

For di momento cu e personanan aki a cay sera, e la crea un snowball effect, cu rapidamente a conduci na un serie di problema serio pa e departamento y consecuentemente e studiantenan cu mester a biaha pa exterior pa sigui cu nan estudio, of pa otronan, simplemente continua cu di nan. Tabata siman pasa ainda cu e directora Proveyer Groot a confirma cu e detencion aki a causa parti di e problema cu studiantenan no por a haya nan placa na tempo.