Van Spaandonk: InselAir no a cancela buelonan pa Corsou

ORANJESTAD - Ningun momento a cancela buelonan pa y for di Corsou. Asina e CEO di InselAir Aruba Stephan van Spaandonk a bisa NoticiaCla.com den fin di siman. For di diabierna mainta e informacion tabata circula cu e compania lo a para tur buelo interinsular. Pero esaki a keda desmenti pa e CEO. "Esey no ta berdad. Nos coneccion entre isla ta sigui normal" e CEO a bisa. "Nos ta trahando duro pa termina e problemanan actual. Esey ta tuma tur nos atencion. Manera nos ta cla cu e proceso nos lo haci un declaracion oficial" van Spaandonk a sigui bisa. 

UPDATE AVION DAÑA NA BARANQUILLA

Mientrastanto e avion cu a keda pega den siman cu a pasa na Baranquilla, Colombia, creando un ola di reaccion, a keda drecha y tabata poni pa yega Corsou diasabra atardi. Asina van Spaandonk a confirma pa e portal aki diasabra. E problema a haya atencion ora cu conocido personalidad di cushina Desiree Da Costa Gomez a critica fuertemente riba su wall di facebook, y cu prensa a capta e situacion. Pero despues cu esaki a sosode, InselAir a atende tur pasahero di tal forma, cu Da Costa Gomez tambe a keda acomoda. "Tur pasahero a yega Corsou ayera nochi bek" da Costa Gomez a bisa riba su pagina di Facebook. "Insel Air a regla transporte y estadia pa henter e grupo cu a keda na Sonesta Baranquilla. Tambe Insel Air a regla pa tur pasahero por a biaha ayera (diahuebs pasa) cu Avianca via Bogota pa Corsou. Un danki na Insel Air pa e esfuerso cu nan a haci pa trece tur hende mas lihe posibel Corsou bek" e conoci personalidad a sigui bisa. NOTA: Foto exclusivo di NoticiaCla.com di e avion fokker di InselAir na Baranquilla diasabra mainta.