Protocol: Arubus responsabel pa cualkier sucedido di bus

ORANJESTAD - E acuerdo cera entre Arubus su gerencia y sindicato STA diabierna, ta mustra cu Arubus lo para responsabel den cualkier eventualidad di un sucedido, y no tin consecuencia legal y/of financiero pa e manehado di bus di Arubus. Esaki tabata debi cu e rijvergunningnan nobo no ta cla ainda, y esaki tabata un di e problemanan cu e sindicato a remarca. Ademas di e punto aki, tabatin 4 punto mas cu a keda acorda y firma pa partidonan encuestion. Otro punto importante, ta e hecho cu e trahadonan no ta wordo castiga pa nan oranan di accion. 

PUNTONAN RELEVANTE

Gerencia di Arubus a bay di acuerdo cu lo redacta un carta dirigi na tur trahador cu ta responsabel pa maneha un bus como nan tarea diario na Arubus NV. E contenido di carta lo tin como meta pa garantisa tur e trahadornan envolvi cu, mientras e proceso pa yega na un rijvergunning nobo, cu ta den man di SVB y DTP, ta tumando lugar nobo, lo no tin ningun consecuencia legal y/of financiero pa manehador di bus di Arubus NV den caso di un sucedido.

SCHALERING 

Un punto importante pa e compania tabata schalering. Schalering di trahadornan di Arubabus NV. Gerencia di Arubus NV lo percura cu dirigentenan di STA ta haña por escrito un oferta /financiero como un alternativa mientras cu ta warda pa e compania Deloitte presenta un pakete total na e partidonan cu ta contene entre otro functiebeschrijvingen y functiewaarderingen nobo. 

BUSNAN DEFECT

E punto principal pa e sindicato, tabata e busnan defecto. Aki tambe a yega un acuerdo. Segun e acuerdo, gerencia di Arubus NV lo trece claridad riba e punto aki y lo presenta por escrito un inventarisacion di tur defecto y un plan pa mehoracion mara na tempo pa percura pa recupera y/of drecha e busnan cu tin defecto. E plan pa recupera y/of drecha e busnan mester wordo presenta mas tarda dia 28 di februari 2017. Gerencia di Arubus NV lo percura pa splica e contenido di e plan menciona na tur trahadornan envolvi.  

REUNION CU MINISTER

Gerencia di Arubus NV y dirigentanan di STA lo percura pa reuni mas pronto posibel cu Minister M. De Meza, encarga cu Transporte Publico, pa trata diferente puntonan di agenda cu e meta pa dialoga den forma positivo riba e futuro di Arubus NV.

NO WORK NO PAY

Partidonan a bay di acuerdo pa e biaha aki no aplica "no work, no pay" pa e trahadornan cu tabata den accion awe 10 di februari 2017 y cu tur trahadornan den accion lo reanuda nan tarea awe merdia 10 di februari 2017. Lesa e concepto di e protocol cu a keda firma AKI.  Foto ta di e accion di awe mainta.