Definitivamente fundacion nobo ta organisa carnaval 61

ORANJESTAD – E grupo cu ta yama su mes “Stichting Gruponan di Carnaval” a yega na un acuerdo cu gobierno diaranson atardi y cu esey, ta practicamente un hecho cu Stichting Arubaanse Carnaval no ta organisa carnaval di Aruba mas. “Den cuestion di algun dia ta set up tur cos y nos ta cuminsa traha”, vocero di e grupo, Swinda Winderdaal a bisa NoticiaCla.com diaranson atardi. No ta conoci exactamente ki dia ni con e proximo plannan lo ta hinca den otro pero e grupo ta garantisa cu lo forma un comision independiente pa atende cu asuntonan di carnaval.

E reunion di diaranson merdia a bin despues cu gobierno a tuma nota di e carta di SAC diamars, y a bisa diaranson mainta cu na nan turno, ta rechasa e pensamento di SAC. “Nos ta bay tuma nos proximo medidanan” Otmar Oduber na nomber di gobierno a bisa diaranson mainta trempan.

Pa e directiva y presidente di SAC, e asunto no tabata un sorpresa. “Mi tabata sa cu esaki lo a bay pasa” ta palabra di presidente di Stichting Arubaanse Carnaval, Tecla Kelly Hernandez. Mientras cu e no a tende oficialmente di parti di gobierno, e la compronde cu gobierno a opta pa no traha mas cu nan, y cu tin e posibilidad cu SAC no por organisa carnaval mas. “Mi no por bisa ainda kico ta pasa, pero nos ta bay delibera den nos seno pa wak kico e opcionnan ta” Kelly a sigui bisa. E opcion di hiba gobierno Corte ta keda un opcion. E futuro di SAC como fundacion ta keda den laira y den e proximo dianan lo haya sa mas kico lo bira di e fundacion y su miembronan.