Fiesta Rotaria 2017 di Rotary Club of Aruba tin fecha caba

ORANJESTAD - Pa di 37 aña Rotary Club of Aruba ta bay organisa e popular Fiesta Rotaria. Esaki lo tuma lugar ariba diadomingo 2 di april 2017 na e parking lot di Stadion Guillermo Trinidad. E miembronan di Rotary ta den full preparacion pa e dia aki. 

Manera pa basta aña caba na final di e Fiesta Rotaria ta saca e numbernan ganador pa e rifa.  Tur aña tin premionan atractivo na unda pa solamente Afl. 25,- bo por gana un di e 12 tremendo premio nan. E bukinan di rifa ya ta obtenibel cerca tur miembro di Rotary. E premio nan ta varia di un auto Suzuki Vitara pa un Smart TV y differente gift certificates.

Presidente Stanley Looman ta commenta cu Fiesta Rotaria ta e evento di mas  grandi di Rotary pa recauda fondo.  E fondonan aki lo wordo reparti entre diferente fundacionan y organsacion den nos comunidad. Kiermen cu cada di compra di un rifa abo ta aporta na nos comunidad. 

Rotary Club of Aruba kier a gradici Jolley Holding, Maduro Travel, AMC Unicon, KLM, Boolchands, Kooyman, CMB, Super Food, Divi Resorts Aruba, Hagemeyer y Pearl Gems pa hasi e premionan di e rifa posibel. Foto for di archivo noticiacla.