Otro demanda contra Aruba pa tiroteo na Renaissance Marketplace

ORANJESTAD - Despues cu 7 luna pasa e familiarnan di e prome di dos victima (Alcides Peralta)  a entama un caso di daño y perhuicio contra pais Aruba (di un tiroteo cu a tuma lugar cinco aña pasa), e di dos caso di daño y perhuicio a keda entama diahuebs na Aruba. E biaha aki familiarnan di e otro victima, Benjamin Castro, a entama un caso di daño y perhucio pa e suma di casi 300.000 mil florin. Argumento principal di e caso(nan), ta compensacion pa e famianan cu a perde nan proveedor repentinamente. Abogado pa e familiares di Castro, Richie Kock a confirma e demanda na NoticiaCla.com diahuebs atardi, pero no tin fecha pa e caso mes tuma lugar. 

E CASO DI TIROTEO

E caso di tiroteo mes a tuma lugar 5 aña pasa (22 di februari 2012) na Renaissance Marketplace unda cu 2 persona latino a keda alcansa y herida mortalmente ora cu polisnan a tira riba e auto den cual nan tabata aden na e mall den oranan di mainta laat. Den un caso civil algun tempo atras, corte a determina cu e tiramento di e polisnan tabata incorecto y cu pais Aruba ta culpabel y responsabel pa morto di e dos personanan aki. Den e prome caso, famianan di e victima Peralta a hiba pais Aruba corte aña pasa juli, y october e mesun aña a keda otorga un suma cuantioso como daño y perhuicio. 

E CASO NOBO

Den e caso di diahuebs, e familiarnan di e otro victima Benjamin Castro kier pa pais Aruba paga pa e daño ocasiona relaciona cu morto di nan ser keri y ta pidiendo un suma cerca di 300 mil florin, calcula den un forma cu segun famia cu ta sigura cu e famia por sigui biba aunke cu nan proveedor no t'ey mas. Foto portada ta di youtube.