CAft a admiti fayo cometi cu conseho publica luna pasa

ORANJESTAD - E colegio di supervision financiero (CAft) a admiti na NoticiaCla.com diahuebs cu nan a comete un fayo luna pasa door di publica un conseho prome cu tempo. "CAft ta confirma cu e conseho emiti luna pasa, conforme propio maneho di comunicacion, mester a wordo poni riba nan website tres siman despues" e colegio a bisa e portal aki diahuebs. Nan ta culpa un fayo tecnico combina cu un eror humano. "Door di un fayo tecnico cometi, combina cu un eror humano, e (conseho) a wordo poni mesora riba e (web)site", e colegio ta sigui bisa. "CAft ta lamenta e fayo aki hopi, y a disculpa su mes mesora na gobierno di Aruba". 

CONFIRMACION DI MINISTER

Tabata algun ora prome awe mainta cu riba pregunta di e portal aki, cu minister di finanza Angel Bermudez a confirma esaki tambe. "E publicacion cu e colegio di supervision financiero di Aruba (CAft) a haci luna pasa riba presupuesto di Aruba, tabata un ekibocacion di e comision", pues segun Bermudez.   Por corda cu ora cu e carta a keda publica riba website, el a trece comocion pasobra no ta usual cu CAft ta publica algo asina lihe of un tipo di carta asina riba nan website. Awe mainta e mandatario a bisa cu tin un ley cu ta stipula kico ta wordo publica y ki ora e ta wordo publica. "Muy en particular consehonan cu nan ta otorga sea na gobierno of/y parlamento tin un periodo y despues nan ta public'e. "Pero loke no ta conseho, loke ta peticion y corespondencia entre gobierno y e colegio, no ta cay bou di e stipulacion aki" Bermudez a bisa. "E carta (di 11 di januari) cu bo ta menciona, ta un peticion y no un conseho pa mas informacion, y esey nan a haci un eror di pone riba nan website" e mandatario a sigui bisa. Pero contrario na informacion anterior cu e mandatario lo a rabia, no ta cuadra cu berdad segun e mandatario mes a bisa. "Ami no tin problema cu ne pasobra riba dje, e tabata comprendibel (e contenido) y nos a cumpli cu ne. A base di esey nan a duna e certificacion cu presupuesto 2017 ta realisabel" Bermudez a finalisa bisando.