Carta di CAft pa gobierno publica luna pasa tabata eror di CAft

ORANJESTAD - E publicacion cu e colegio di supervision financiero di Aruba (CAft) a haci luna pasa riba presupuesto di Aruba, tabata un ekibocacion di e comision. Asina minister Angel Bermudez di finanza a sigura NoticiaCla.com awe mainta. Por corda cu ora cu e carta a keda publica riba website, el a trece comocion pasobra no ta usual cu CAft ta publica algo asina lihe of un tipo di carta asina riba nan website. Awe mainta e mandatario a bisa cu tin un ley cu ta stipula kico ta wordo publica y ki ora e ta wordo publica. "Muy en particular consehonan cu nan ta otorga sea na gobierno of/y parlamento tin un periodo y despues nan ta public'e. "Pero loke no ta conseho, loke ta peticion y corespondencia entre gobierno y e colegio, no ta cay bou di e stipulacion aki" Bermudez a bisa. "E carta (di 11 di januari) cu bo ta menciona, ta un peticion y no un conseho pa mas informacion, y esey nan a haci un eror di pone riba nan website" e mandatario a sigui bisa. Pero contrario na informacion anterior cu e mandatario lo a rabia, no ta cuadra cu berdad segun e mandatario mes a bisa. "Ami no tin problema cu ne pasobra riba dje, e tabata comprendibel (e contenido) y nos a cumpli cu ne. A base di esey nan a duna e certificacion cu presupuesto 2017 ta realisabel" Bermudez a finalisa bisando. Reaccion di CAft no tabata disponibel ainda awe mainta.