Caso MC Oz ta bin dilanti prome siman di maart

ORANJESTAD - E caso di e locutor hoben O. Jansen conoci como MC Oz, lo bin dilanti hues den forma di pro forma dia 3 di maart proximo. Asina vocero di ministerio publico Ann Angela a confirma pa NoticiaCla.com awe mainta. E caso mes (contenido) lo wordo trata dia 9 di maart proximo. E acusacion contra Jansen ta 'tene relacion sexual cu un persona bou di 16 aña di edad'. E caso aki, mirando popularidad di e hoben, a haya hopi atencion den prensa y ainda ta topico di combersacion. 

SU DETENCION

Husticia a detene Jansen na comienso di december aña pasa. Tanto abogado di e hoben locutor, esta Chris Lejuez como vocero di ministerio publico Ann Angela a confirma e detencion e tempo ey. "Si, ta berdad" ambos a bisa. Mirando e popularidad di e locutor, e noticia a plama hopi liher. 

DIFICIL CU CASONAN ASINA

Despues Jansen su detencion a keda prolonga cu 60 dia pa hues comisario. Tabata durante e noticiero NoticiaCla merdia na Power FM (porcierto unda cu e dj ta labora) cu Lejuez a confirma  cu e ta un 'zedenzaak' cu ta relata abuso sexual cu un menor. Loke ta complica e caso pa su cliente ta cu e persona a admiti cu e tabatin relacion cu e persona menos di 16 aña. "Bo por conclui for di esey cu e ta haci su mes culpabel na violacion di e ley ey" Lejuez a bisa.