CITGO lo inverti mas di 2 biyon entre 2017-2020 den refineria na Aruba

ORANJESTAD – CITGO lo inverti riba 2 biyon florin den e refineria den e proximo 3 añanan. Asina e rapport di Aruba Investment Bank (AIB) traha riba peticion di gobierno di Aruba ta mustra. Tambe ta mustra cuanto e refineria lo aporta cu economia di Aruba. Segun e rapport ta ilustra, ta papia di mas di 340 miyon florin cu ta bay den economia, mientras cu entre 180 y 200 miyon ta bay den finanza publico. Tur esaki segun Arends, ta confirma e pensamento anterior di gobierno su efecto pa cu e refineria riba Aruba.  

CONTRIBUCION

Segun e cifranan presenta, pa 2017 ta proyecta cu e contribucion di e reapartura di CITGO na nos economia lo ta alrededor di Afl. 280 miyon, esaki ta 5.8% di nos GDP. Door di inversionan planea door di CITGO, e efecto economico ta hopi grandi den e lunanan y añanan nos dilanti. “E contribucion aki ta aumenta pa 6.6% na 2018 y 6.0% na 2019, te ora cu alcanza e percentahe di 7.1% durante e prome aña di operacion na 2020,”  Arends ta splica a base di e rapport.  

SPLICACION ADDICIONAL

Riba pregunta di e portal aki, Arends a splica cu e caida den primanan pa e.o. AOV, AVV, AZV y BBO despues di 2018 tin su motibo. Segun Arends e primanan di p.e. AZV ta mara na e cantidad di hendenan directa y indirectamenten emplea. "2017-2018 ta e piek di e rehab, 2019 e ta cuminsa normalisa y 2020 en verder e ta normalisa, te na momento di e next turnaround" Arends a sigui bisa. 

CONTRIBUCION NA NOS ECONOMIA

E contribucion na nos economia ta consisti di entrada pa gobierno den forma di impuesto y prima, empleo y aumento den consumo y inversion den sector priva. E estudio di AIB ta asumi cu salario cu e refineria y contractors lo paga na su empleadonan local lo wordo gasta den e economia local principalmente.Ta calcula cu e effecto di esaki pa nos GDP den 2017 lo ta alrededor Afl. 44 miyon. Tambe ta premira otro sectornan cu lo brinda nan servicio na e refineria ta contribui cu un total di Afl 80 miyon na nos economia. “Remarcabel ta e hecho cu e contribucion di e reapertura di e refineria ta genera mas entrada cu a ser presupuesta pa aña 2017. Realisacion di esaki lo reduci e presionnan presupuestario enormemente,” segun minister Arends.