Tjon: Un cuidado di preso di KIA deteni for di diamars

ORANJESTAD - Un cuidado di preso di KIA deteni for di diamars. Asina director di Korrectie Instituut Aruba (KIA) Rocco Tjon a confirma e noticia cu ayera tabata conoci caba pa NoticiaCla.com. Segun Tjon, e cipier (cuidado di preso) femenino ta deteni a base di sospecho di contrabanda. No a bisa kico e contrabanda ta, pero tin informacion cu ta trata di droga y cellular. "E caso a tuma lugar ayera y ta ayera el a wordo deteni" Tjon a bisa e portal aki awe mainta. 

SITUACION DI DETENCION Manera ta conoci ora un cipier cay cera, e ta bira mas fastioso p'e pa su situacion cu e ta haya su mes aden. E tabata 'cuida preso' y awor e mes ta un preso. Y e consecuencia y represaya ta un asunto cu tin cu tene cuenta cune. Pero segun Tjon, cos no ta asina avansa ainda, esta cu den e fase aki 'ainda' e cipier no a yega KIA, pero ta cera otro caminda (un warda di polis). " Afhankelijk di onderzoek, si detencion wordo prolonga lo e jega uiteindelijk na Kia" Tjon a bisa. Segun e director, e investigacion mester caba y determina kico ta kico cu e caso." Si e jega uiteindelijk Kia, mescos cu otro ambtenaarnan cu tin un trabou "gevoelig" lo tene esaki na cuenta pa wak unda ta cer'e y tuma e 'nodige maatregelen' nan pa garantisa veiligheid" Tjon a finalisa bisando.