Hotel na Aruba victima di virus internacional di credit card

ORANJESTAD - Turistanan cu a keda na Holiday Inn Resort na Aruba aña pasa entre augustus y december, por a bira victima di fraude cu credit card. E ta un di e hotelnan victima di un problema di credit card cu a tuma lugar aña pasa segun e portal Business Travel News ta raporta, aunke tin multipel otro portalnan cu tambe a raporta e noticia e siman aki. E compania madre InterContinental Hotels Group (IHG) a cuminsa investiga su sistemanan na fin di december di aña pasa. Tabatin un sospecho ora cu a raporta 'actividad sospechoso' riba credit cards uza na e propiedadnan entre augustus y december di aña pasa na e hotelnan di e cadena menciona. Un virus den e sistema (malware) tabata uza tarhetanan di credito den e periodo, colectando nomber di e doño di credit card, number di e carchi, fecha di vencemento, y e number  CVV. Na augustus ultimo multipel propiedad di IHG tabata blanco di e atake aki, pero uno mas amplio riba e sistema POS di e hotelnan HEI & Resorts.  Segun e informe, Holiday Inn Resort a keda afecta entre augustus 1 y november 28, y ta trata di e varios restaurantnan cu tin den e hotel. Otro propiedadnan afecta ta entre otro na Atlanta, Chicago, Los Angeles, Nashville, San Francisco, Silicon Valley, Toronto y  Washington, D.C.