Cu avionnan ainda na tera, InselAir a tuma medida

WILLEMSTAD/ORANJESTAD - Cu gran parti di e flota di jet di InselAir na tera ainda, (6), e aeroliña a hay'e obliga di adapta su schedule mas ainda pa aumenta e confiansa di e loke nan por. Hefe di Direccion di Aviacion Civil di Aruba Edwin Kelly a confirma na NoticiaCla.com dialuna atardi cu ainda tin 6 avion na tera; 4 cu nan a ground y 2 cu nan mes a ground. No ta conoci te ki dia e avionnan aki ta wordo libera.   

ADAPTA E OPERACION

Pa medio di un comunicado dialuna atardi, e CEO nobo Gilles Filiatreault y su management Team a tuma cierto pasonan pa 'aumenta e confiabilidad di e network di e aeroliña'. Esey ta encera entre otro cu InselAir ta saca su buelonan pa Barranquilla y San Juan for di circulacion. Adicionalmente en bes di dos biaha pa siman, lo bula e ruta Santo Domingo/St Maarten un biaha pa siman so. E cambionan ta wordo implementa e siman aki mes y pasaheronan cu ta afecta, lo wordo avisa.  

HUUR AVION EXTRA DEBI CU FLOTA TA NA TERA

Mirando cu e flota ta na tera ainda, (confirma dialuna atardi pa hefe di departamento di aviacion civil di Aruba Edwin Kelly na NoticiaCla.com), a pone cu Insel Air mester a huur avionnan extra di afor.  E agencia di noticia na Corsou Persbureau Curacao ta raporta cu InselAir a 'huur' avionnan  di Estelar di Venezuela, Swiftair di Merca, Fly Allways di Suriname, y Dominican Wings di Republica Dominicano. Cada uno lo 'fia' Insel Air un avion. E aeroliña mes no ta haci mencion di esaki den nan comunicado cu solamente cu ta 'wetlease' avionnan di otro companianan. 

MEHORACION DI E OPERACION

Loke tin cu mehora tambe ta e prestacion di e rutanan principal di e aeroliña entre e islanan ABC, y St Maarten. Daily service to/from ABC-islands & St. Maarten. Pa informacion di dia, e pasaheronan por consulta e website di e aeroliña: www.fly-inselair.com/flightstatus

INFORMACION PA PASAHERO

Segun e aeroliña, pasaheronan cu a cumpra un pasashi cu InselAir pa un di e rutanan menciona, y cu ta wordo directamente afecta, lo wordo consulta pa e Customer Relations Team di e compania. E pasaheronan aki lo wordo reembolsa completamente. Pasaheronan cu InselAir no logra contacta, ta wordo suplica pa tuma contacto cu e website. "Nos ta lamenta cu nos tin cu desapunta nos pasaheronan, pero nos lo sigura cu esaki lo wordo atendi di un forma odrena" Filiatreault a bisa. "Nos ta tumando desicionan pa mehora nos prestacion y pa provee nos pasahero y empleadonan loke nan merece: un aerolina di confiansa" Filiatreault a finalisa bisando.