ATA: Invitacion pa team di Superbowl ta un 'PR stunt'

ORANJESTAD - E idea pa invita e ekipo perdedor di e wega di futbol Americano Superbowl di diadomingo, ta un 'stunt promocional'. Asina CEO di Aruba Tourism Authority Ronella Tjin Asjoe a sigura NoticiaCla.com dialuna anochi. Despues cu e portal aki a bin cu e noticia cu ATA a invita henter un ekipo di Superbowl (futbol Americano), esun perdedor cu tur gasto paga,  ela genera un ola di critica y reaccion, principalmente di e mundo di deporte. E critica principal tabata cu mientras cu Aruba su deporte ta carece di fondo, ATA ta nenga sponsor deporte local, pero si ta invita un grupo grandi di primordialmente miyonario pa bin pasa vacacion na Aruba riba gasto di Aruba. Tjin Asjoe a bin bek y splica cu e situacion no ta manera cu e ta aparece. 

UN STUNT PROMOCIONAL

Tjin Asjoe a confirma e raportahe di NoticiaCla.com, despues cu hopi no por a kere loke nan tabata lesa. Hopi a considere insolito cu ta invita miyonario bin pasa bon, mientras cu deporte di Aruba mes no ta haya placa. Tjin Asjoe a mustra mesora cu no ta un idea nobo, sino un ripiticion di algo cu nan a purba na 2012 caba, ora cu nan a invita un otro team perdedor bin pasa bon na Aruba. Segun e CEO, e solo mensahe di invitacion a genera asina hopi publicidad pa Aruba e tempo ey (media buzz), cu nan a opta pa hacie awor atrobe. Diadumingo tabatin e wega final di temporada di e deporte aki, y segun e gigante di rating di television Mericano, mas di 106 miyon hende a wak e wega aki.  E forma con e invitacion di Aruba ta funciona, ta cu e ta wordo publica pa e agencia di noticia, y aki centenares di outlets di noticia ta gara esaki y republica e 'gesto' aki. ATA na su turno ta converti e cobertura aki den cifras y ta compara e balor financiero cu un publicacion asina lo a costa. Y for di e prome indicacion di dialuna so, un total di160 publicacion a raporta e storia, cu ta traduci den 87 miyon 'impresion'. Entre e instancianan noticioso cu a publica esaki tabatin Yahoo, Travel Impulse, Atlanta Business Chronicle, Boston Business Journal, canalnan di television ABC di Atlanta, Fox y mas. 

E REALIDAD DI E INVITACION

Mientras cu enberdad ATA ta haci e invitacion segun Tjin Asjoe, masha poco ta haci uzo di e invitacion. Esey a keda prueba den pasado, aunke claro cu e ta keda un risico. Y pa esnan cu dicidi di bin, nan ta wordo mara na un clausula cu ta encera cu nan mester genera e publicidad necesario uzando nan status di celebridad. Aki ta unda cu e placa ta core y unda cu Aruba ta beneficia. 

ATA Y SPONSORSHIP LOCAL

Tjin Asjoe ta consciente di e critica ricibi, y a mustra cu enberdad nan ta haya peticionan y ta evalua esaki. Pero pa ley, nan por patrocina eventonan y actividadnan cu ta genera trafico internacional primordialmente, y no cosnan cu ta genera solamente trafico local. Esey no ta kita afo cu nan ta evalua tur sponsorship cu nan ta ricibi tur aña di instancianan deportivo.