Ciclistanan preocupa a bin hunto cu mensahe pa seguridad den trafico

ORANJESTAD - Un dia despues di un accidente entre un cyclista y un automobilista, un grupo di 150 ciclista a bin hunto pa manda un mensahe pa comunidad pa tene cuenta cu nan 'tambe ta hende'. Riba e parkeerplaats di Alhambra, nan a uni y papia riba e tema. Entre esnan presente, tabatin e grupo di Swikers, dos minister (Alex Schwengle di Deporte y Paul Croes di asuntonan di Hubentud) y casa di e ciclista herida Faysell Baroso, esta abogado y politico Joselin Croes. Na final tur a mobilisa riba nan bicicleta riba caminda pa asina haci un cori di solidaridad for di Phoenix Hotel te Bestuurskantoor y bek.

APOYO PA BAROSO

Casa di e victima tabata contento cu e gesto. Mientras cu su casa ta recuperando den hospital, e mes a duna acto di presencia y a elogia e grupo di ciclista cu a bin hunto. Su casa a keda alcansa un dia prome pa un hoben automobilista, manehando su auto 120 km (segun Croes) ora cu e casa a keda alcansa. Nada no a kibra den curpa di Baroso, pero ela haya hopi sla si y e potret di Baroso ta mustra pio di loke e ta. Esey no ta kita afo cu e tin hopi dolor. Croes mes a splica NoticiaCla.com cu ela sugeri pa haci algo pa ciclistanan por practica nan deporte favorito riba tur diasabra y diadomingo mainta trempan. Entre nan, pone speed limit pa e orarionan specifico y e ruta di Alhambra pa lighthouse, un ruta hopi frecuenta pa e mas di 1000 cicilistanan cu ta practica e deporte fin di siman primordialmente. 

GOBERNANTENAN

For di minister di deporte Alex Schwengle, e portal aki a haya e promesa cu nan ta bay haci mas ainda cu loke nan ta haciendo ainda. Sinembargo, ta keda na cada ciudadano pa ta mas responsabel riba caminda. "Nos por bin cu 100 polis mas 100 ley mas, pero si e comunidad no ta responsabel bo no por haci mucho" Schwengle a bisa. E mes a haya e mensahe di e grupo di dialuna atardi uno bunita. "E mensahe cu hende nos ta" a conmove e mandatario. A splica cu departamento di salud DVG ta promoviendo e asina yama maneho di 'verkeersveiligheid', osea trafico sigur, pero lo intensifica esaki cu un campaña mas agresivo, y a haya e ciclistanan pa tambe participa den e campaña aki.