Total di atraco na 2017 ta 14, mayoria cometi pa Venezolano

ORANJESTAD - E presentacion awe mainta den parlamento riba e tema di criminalidad a duna un bista alarmante pa Aruba. Primordialmente e cantidad, e tipo di atraco y e problema pa por gara e personanan. Tur ta informacion cu polis mes a presenta awe mainta (hoofd inspecteur Fredson Panneflek) cu a pinta e plachi basta preocupante. Entre e informacionan concreto duna awe mainta, ta e cifra real di atraco, cu ta 14 (versus e cifranan varia cu a keda publica den varios medio ultimo tempo).  E reunion tabata solicita pa Parlamento pa minister di Husticia Arthur Dowers duna cuenta riba e ola di criminalidad cu tin na Aruba ultimo tempo. 

MODUS OPERANDI DI ATRACO 

Den e presentacion di Panneflek, a splica cu a nota cu den 2017, mayoria atraco a tuma lugar den casnan priva, cu ta diferente cu añanan anterior. Antes atraconan tabata tuma lugar den negoshi, lugarnan huridico, lugarnan di lotto, supermercado chines. "Pero awor nos ta nota un duidelijke stijging den e aantal atraco den woning" Panneflek a sigui bisa. Atraco tabata tuma lugar na cas di comerciantenan, hende cu tin placa. "Aworaki e beeld a cuminsa cambia". A nota cu atraco ta tuma lugar riba persona, en bes di negoshi. 

TRENDS

Tin un aumento di atraco en general den 2017. Tambe a nota un caida den e botin cu ta wordo horta compara cu añanan anterior. Hopi atraco ta atraco no planea, esta riba impulso. Hopi lihe, sali bek di e lugar. E gruponan cu ta comete atraco ta di 'wisselende samenstelling' unda cu ta cambia constantemente depende di e tipo di atraco. Tin un cambio na e tipo di atracadornan cu ta mayoria Venezolano. "Hopi di nan ta experencia y nan tin un backround criminal na Venezuela". Nan forma di mobilidad tambe a cambia, unda cu antes ta comete atraco cu auto, awe ta riba motorcycle of na pia of bicicleta. "Hopi no ta tuma e moeite pa tapa nan cara of uza handschoen, cu tambe ta duna cierto indiaccion" Panneflek a sigui bisa. 

ATRACADORNAN NO TIN MIEDO PA WORDO RECONOCI

E atracadonan no tin miedo pa wordo reconoci segun Panneflek su presentacion. E atracadornan no ta di aki. Nan no ta wordo reconoci y ta sigur cu nan ta 'desconoci' na Aruba. "Segun nan, nan chens pa wordo gara ta chikito". Pa determina e identidad ta dificil segun e hoofdinspecteur. "Hopi biaha nan kier drenta cu pasaporte falso. Porta cu pasaporte real, pero cu documento falso. Si bo gara nan mes, nan no tin nada riba nan. Pues pa bo identifica nan, e ta bira un challenge pa nos hopi biaha" Panneflek a sigui bisa. E atracadornan por drenta Aruba y sali hopi facil. "Prome cu nos por identifica nan, nan ta sali caba (cu avion)". Nan (atracadornan) ta contento cu nan tin un botin chikito, cu suma di 300 dollar. E 'pakkans di nan ta bira un reto pa polis extra di loke nan tin caba. Loke ta haci e cos mas fastioso segun Panneflek, ta e localnan cu ta yuda e atracadornan. Ta trata di hende cu ta aloha e hendenan aki, duna nan informacion di negoshi pa atraca etc. 

CANTIDAD DI ATRACO COMETI

Segun Panneflek, den januari tabatin 12 atraco registra y e luna aki 2, di cual e ultimo tabata diadomingo anochi. Mayoria di atracadornan di aña pasa tabata Arubiano, pero persona di Venezuela ta na di dos lugar. "Antes e cifra di hende (di Venezuela)  cu ta comete atraco tabata abou, mientras cu esunnan di Colombia tabata hopi mas halto. Aworaki esey a cambia. Atraconan na San Nicolas aña pasa tabata mas hopi, sigui pa Noord y Santa Cruz. San Nicolas tabata mas hopi na 2016 den oranan di anochi den caya principal. Atraconan awor ta reparti na Noord, y tin un 'cluster' na San Nicolas.