Gobierno: SAC no ta haya permiso pa carnaval mas

ORANJESTAD - Gobierno lo tuma paso necesario contra Stichting Arubaanse Carnaval, pasobra e fundacion di Carnaval a rechasa e proposicion di gobierno.  " Un di nan ta cu lo cuminsa cu tramite pa kita e permiso di SAC pa nan sigui organisa carnaval di Aruba. Esey ta e conseho cu minister Otmar Oduber lo haci na prome minister Mike Eman, cu ta e mandatario encarga cu e permiso aki. "Nan no a cumpli cu e peticion haci na na". Esaki ta e mensahe cu e mandatario a presenta  diaranson mainta durante un conferencia di prensa. E ta lamenta e forma cu SAC a bay prensa prome cu papia cu e mandatario, pues a escohe pa haci mescos diaranson mainta. E mandatario no tabata nada contento riba e forma con SAC a actua den e asunto aki. Un di e prome pasonan ta cu a invita e gruponan uni pa sinta cu e mandatario pa wak si nan ta keda riba nan punto cu nan no ta traha cu SAC. "Mi ta lamenta e posicion aki y e forma cu e la bin dilanti, sobre todo teniendo na cuenta cu 95% di e gruponan di carnaval a bisa cu no ta sinta na mesa cu e constelacion actual di SAC". 

Lo forma un instancia independiente profesional pa maneha nos carnaval di Aruba, segun nos tempo, e mandatario a sigui bisa. Mientras cu tin un plan B, cu ta un organisacion nobo, e detayenan no ta conoci y lo traha riba esaki unabes cu Gruponan Uni reuni cu e mandatario mas den dia diaranson. Si dado caso SAC hiba gobierno Corte, lo warda esey pero e mandatario a garantisa cu 11 di november proximo carnaval 61 ta ranca sali.