Aseguradonan ZVK a adapta operacion di transporte debi na situacion Insel Air

KRALENDIJK - Aseguradonan di Zorgverzekeringskantoor BES (ZVK) cu mester biaha pa exterior pa consulta of tratamento super specialisa,  tambe a keda afecta pa e situacion di InselAir. Como tal pa medio di un comunicado nan a informa diabierna cu for di diahuebs 2 februari ta haci e biahenan aki pa medio di buelonan charter pa Corsou y Aruba. For di ZVK, NoticiaCla.com a compronde cu esaki ta debi na e situacion actual di InselAir cu no por garantisa un schedule manera mester ta. Pa loke ta e cambio di buelonan, nan ta na encargo di e compania di aviacion EZ-air y lo ta pa e proximo 3 lunanan. Un ke otro ta parti di un seri di provision ku ZVK a tuma pa mas tanto posibel, sigura cu aseguradonan ta yega na tempo pa nan citanan pa tratamento of consulta medico y, pa mas tanto posibel sigura cu nan por yega safe y na tempo bek na nan respectivo islanan

E buelonan charter ta tuma luga diariamente for di Boneiro pa Corsou y Aruba. E asina yama ‘buelonan di MRI’ pa Aruba, ku ta tuma luga tur diasabra, ta continua normalmente. Tambe e buelonan di evacuacion di emergencia pa medio di ‘Air Ambulance’ (staciona na Boneiro) y esnan pa medio di e helicopternan ‘MediVac’ (staciona na Sint Eustatius), tambe lo keda normalmente disponibel. Esaki ta conta tambe pa e buelonan charter pa y for di Sint Eustatius pa Sint Maarten.

ZVK lo sigui e desaroyonan pa loke ta coneccion aereo pa otro destinacionnan cu hopi atencion y lo informa  su aseguradonan na tempo di cualkier desaroyo cu surgi y di pasonan cu eventualmente mester tuma.