Paraguana Naviera ta basa ferry ABC riba MoU cu Reino

ORANJESTAD - Pa e explotacion di un servicio di ferry entre e peninsula di Paraguana y e islanan ABC, e compania di nabegacion Venezolano Naviera Paraguana ta sali for di un Memorandum of Understanding (MoU) entre Reino y Venezuela. Esaki ta para den e buki di informacion cu aña pasa november a duna e stakeholdernan Arubiano.

Den e buki tin para cu Naviera Paraguana - banda di e Plan pa Patria cu gobierno venezolano a formula - ta mira e MoU pa cooperacion entre e Republika Bolivariana Venezuela y Reino Hulandes como ‘fundeshi’ di su explotashon di empresa.

Na juni 2013 e minister hulandes di Asuntonan Exterior Frans Timmermans, su colega venezolano Elias Jaua Milano, embahador Hulandes Johannes van Vloten Diessevelt, prome minister Daniel Hodge di Corsou y e prome minister Arubiano Mike Eman a firma e MoU.

Akiden tin para ku Reino y e regimen venezolano lo bai coopera den e area di entre otro economia, defensa, medio ambiente, telecomunicacion, transport y ciencia.

A palabra pa lanta grupo di trabou pa tur aña reuni riba nivel administrativo. Cada dos aña tur dos pais lo a bini hunto riba nivel di minister pa delibera. Na februari di 2014 e corant di estado venezolano a anuncia cu e MoU tabata na vigor den e pais.

Na september di aña pasa Naviera Paraguana a presenta e barco Paraguana den haf di Guaranao cu e anuncio cu na november e servicio di ferry lo ta operacional. Na Aruba autoridadnan a declara cu e servicionan di gobierno no tabata cla pa acohe pasahero, aunke cu e autoridad di haf APA si a priminti un luga pa e ferry mara. Eman y e otro ministernan a hasta nenga di ta na altura di e plannan di e ferry. Na october atrobe un autoridad venezolano a anuncia su yegada durante e re-apertura di e refineria na San Nicolas. Entre tanto a lease e ferry y e ta nabega un otro ruta.

Representantenan di Naviera Paraguana na Aruba ta bisa cu te ainda nan kier nabega pa y entre e islanan ABC.

For di Ret Karibense Autor Ariën Rasmijn