Personal di Reino Hulandes prohibi pa bula cu InselAir

DEN HAAG - Personal di Reino Hulandes ta prohibi pa bula cu Insel Air. Secretario di estado Dijksma y minister Ronald Plasterk a informa Tweede kamer di e situacion di seguridad di Insel Air y cu a informa cu gabinete a dicidi cu personal di Reino ta prohibi pa bula cu InselAir. Esaki despues cu gobierno di Merca a haci mescos. Segun e mandatario, cu e carta e kier informa riba e precupacion cu tin den e gabinete Hulandes riba e situacion di seguridad di e aeroliña Insel Air. "Pendiente e resultado di mas informacion riba, y basa riba investigacion na e situacion di seguridad actual di e compania, e gabinete a dicidi pa prohibi ambtenaren Hulandes di bula cu InselAir pa biahe di trabou y kier informa otro biaheronan tambe di e caso aki. Basa riba e informacion concreto cu ministerio di medio ambiente y infrastructura tin, esaki ta regarda buelonan di InselAir International BV. Ta investigando si e prohibicion ta valido tambe pa InselAir Aruba, segun e carta ta sigui bisa. 

GROUNDING DI AVION

E carta sigui haci mencion di e situacion di coneccion aereo entre e islanan Caribense door di Insel Air y tambe e responsabilidad di cada departamento di aviacion civil. Ademas ta skibi tambe riba e grounding di avion di InselAir Aruba cu direccion di aviacion civil a haci recientemente riba avionnan di InselAir Aruba. E carta ta papia tambe di e prohibicion similar mas prome di consulado Mericano pa nan personal pa buelonan cu InselAir. 

PREOCUPACION

Secretario di estado di infrastructura y medio ambiente a informa di su preocupacion na e coleganan di Aruba y Corsou y a pidi nan pa tuma accion adecuado. Cu Corsou su gobierno a palabra cu lo bay duna asistencia a termino corto. Tambe tin combersacionan planea cu autoridad di Aruba pa haya claridad si bulamento cu InselAir ta suficientemente safe. 

Gobierno Hulandes a mustra di ta conciente di e coneccion aereo entre e islanan di Caribe Hulandes y e buraco cu por surgi si InselAir cay afo y nan ta como tal den combersacion cu e gobiernonan di respectivo islanan pa mira con por trata e asunto y ki papel Hulanda por hunga den esaki. Lesa e carta aki.