Filiatreault: Mester gana confortabilidad y orguyo bek pa InselAir

WILLEMSTAD - "E cos mas importante pa nos ta pa trece e confortabilidad pa e biahero pa nan por bula cu nos, y trece tambe e orguyo bek pa nos empleadonan" Asina e CEO nobo di InselAir International e Canadees Gilles Filiatreault a bisa durante su prome encuentro cu prensa na Corsou diaranson. E situacion actual a trece hopi frustracion pa tanto pasahero como e trahadonan segun Filiatreault. A referi tambe na e bululu cu a sosode na aeropuerto algun dia prome. "Algo cu nos kier evita a cualkier costo".  Filiatreault a yega Corsou diadomingo y a cuminsa mesora na pone su mes na altura di e situacion y e mision cu e tin, pa drecha e situacion na e aeroliña aki. 

PLAN DI MANEHO

Segun Filiatreault, ela instrui e management team cu e prioridad ta pa evalua e team completo, e structura di e compania, e resultado financiero y e veracidad di esaki. "Si no tin e cifranan corecto pa traha ariba, bo fundeshi ta keda dudoso".  Filiatreault a admiti cu tin hopi trabou pa haci e proximo simannan, y cu e tin intencion di tene tur protagonista durante e periodo aki. "E unico forma cu nos por mehora InselAir, ta pa tin tur hende 'abordo'". A admiti cu publicacionan negativo den prensa riba e susesonan no ta bon pa e compania, no pa e pais y tampoco e economia. "Sigur no den e mundo di internet manera cu e ta aworaki". 

STRUCTURA DI INSEL AIR. 

Filiatreault a splica cu InselAir ta un aerolina duomodular, esta e parti regional y esun internacional. A splica cu network di e avionan chikito ta esun cu ta genera entrada. Esun di avionan grandi (internacional) no ta conoci ainda. E pasahero riba distancia cortico ta paga mas placa pa cada miya, y esun di distancia largo ta paga menos.  Filiatreault a splica cu esun di distancia largo tin mas competencia y mester baha e tarifa pa por competi. Den caso di esun local (regional) e ta practicamente un monopolio. Como tal e parti regional ta esun cu ta sostene e compania financieramente, incluyendo esun e parti internacional.