Ta compronde critica riba castigo pa homber 'pedofiel'

ORANJESTAD - E hecho cu recientemente fiscal a pidi un castigo di 3 aña y mey pa e homber Dos Santos (conoci como e pedofiel sunu), tin su motibo segun Procurador General Alex van Dam. "Hende ta kere cu e ta un castigo abou. Esey ta pa cada ken (incluyendo politico) pensa esey si nan kier" van Dam a bisa NoticiaCla.com e siman aki. Mas e no por a bisa riba e caso particular aki pasobra e caso ta den tratamento ainda. Pero ela sigura cu ora cu ta bay pa un castigo, ta hiba tur aspecto cu ne cu mester pisa den un caso asina. E pregunta a bin despues di e ola di  critica den comunidad riba e peticion 'abou' di castigo.  

CON TA PIDI CASTIGO 

No ta sin mas ta inventa un sentencia pa un persona, pero tin cu pensa tambe p.e. si e acusado/sospechoso ta conciente psycologicamente di su actonan. "Si esaki ta e caso, no por bay cu un castigo halto" e PG a sigui bisa. Y berdad cu un huez ta scucha y ta tene e gritonan di comunidad pa un caso. Si e caso specifico a shock e comunidad, e hues(nan) ta tene cuenta ora di dicta un sentencia. "Den casonan penal, nos ta pensa hopi bon prome cu bin cu un castigo. Nos ta pisa tur cos, hasta loke un hues por impone den tipo di casonan similar. Nos ta mira riba e impacto riba e victima, e persona como sospechoso, y asina tin mas. Tin un lista completo di factor cu ta pisa", van Dam a sigui bisa. "Si hende ta critica e castigo, nos ta tuma nota di esey. Pero mi kier sigura comunidad cu nos ta tene cuenta cu tur esaki. Den e caso aki e fiscal mayor, PG y tur otro den OM, ta sinta hunto y ta determina e exigencia di castigo". A uza como ehempel con a pidi 25 aña pa e asesinato na The Mill, siendo cu castigo final tabata 22 aña.