Consulado Mericano a prohibi su personal pa bula InselAir

WILLEMSTAD - Consulado Mericano na Corsou a prohibi su personal pa temporalmente bula cu InselAir. E consulado ta bisa pa medio di un nota publico, cu ela informa su ciudadadanonan Mericano cu ela adapta e politica aki despues di un revision interno relaciona cu seguridad. E ta sigui repasa casonan cu a sosode recien cu ta relaciona cu seguridad di e aeroliña. Entre nan e problema di presion den cabina dia 27 di december ultimo di un buelo di Insel Air di Corsou, rumbo pa Colombia. Tambe ta haci mencion di e mesun problema di presion, pero riba un buelo di Corsou pa Miami cu a resulta den un aterisahe di emergencia.  "Consulado ta compronde cu den e ultimo 6 luna, 4 otro buelo di Insel Air a bolbe Corsou debi na problema cu presion den cabina, of fayo electrico. Otro asunto di seguridad a pone cu departamento di aviacion civil di Aruba a ground algun avion di e compania. E politica nobo aki ta aplica solamente pa biahe oficial di personal di consulado Mericano.  Nan lo reevalua nan situacion mientras cu InselAir su condicion di seguridad mehora."