Bikker: KVK a nenga cambio inscripcion directiva PDR

ORANJESTAD - Camara di Comercio manda un carta pa sr. Alonso Tromp caminda basicamente a nenga di inscribi su peticion pa cambio di e directiva di Democracia Real den e registronan. Por lo menos segun lider di e partido PDR Andin Bikker. Ela sigura NoticiaCla.com diaranson merdia cu asina ela keda informa. E portal mes no a wak e carta of email, y no a haya un reaccion ainda di presidente nobo di KVK Ernst Mohamed riba e tema aki. 

INFORMA PA KVK

Segun Bikker den un comunicado despues, e ta mustra cu ela compronde cu ta basta dia caba KVK lo a informa verbalmente na sr. Tromp cu Camara di Comercio no ta inclina pa bay over na inscribi e peticion pa cambio di directiva di PDR y cu e ta liber pa e bay Corte a base di articulo 16, inciso 2, di e Handelsregisterverordening. "Door cu ta sr. Tromp ta esun cu kier cambia e inscripcion actual na Camara di Comercio, ta na su persona pa cana e caminda pa Corte, si e ta pensa cu e tin un caso. Ami no ta kere cu e tin un caso" Bikker a sigui bisa den su comunicado. Bikker ta lamenta cu tin un par di persona cu lo a cuestiona Camara di Comercio. "Nan mester compronde cu Camara di Comercio ta imparcial y ta haci su trabow di salbaguardia e registro. En todo caso cu e desicion di Camara di Comercio e directiva actual y di semper di Democracia Real ta keda e unico directiva, dus nada no a cambia den directiva di PDR y Parlamentario Andin Bikker ta keda lider di e partido cu e a funda na 2004" Bikker a sigui bisa.

COMISHON DI BON BOLUNTAD

Finalmente a remarca cu un grupo di amigo mutuo a propone pa explora si por habri dialogo pa medio di un Comishon di Bon Boluntad. Bikker a indica cu como personanan adulto y profesional e caminda di dialogo a base di buena fe mester por keda habri si tin disponibilidad pa cu esaki. Andin: "Mi ta lamenta cu sr. Tromp a kies un caminda di discordia y ningun dia a tuma contacto cu mi persona, no obstante cu nos conoce otro di chikito y cu bispo di Pasco mi a yame invite pa nos reuni." e parlamentario a finalisa bisando.