Cantidad di chauffeur burachi alarmante

ORANJESTAD – E cantidad di chauffeur burachi ainda ta alarmante. “Lamentablemente Cuerpo Policial a constata cu ainda tin demasiado hende ta core auto bao di influencia di alcohol y algun di e chauffeurnan aki a wordo deteni”, asina Comisario di Polis, Trudy Hassell, a bisa. A duna hopi procesverbaal na chauffeurnan coriendo sin seatbelt y a haya varios mucha bao di 12 aña di edad sinta dilanti den auto. Tur esakinan ta infraccionnan contra leynan di trafico vigente. Tabatin tambe detencion di un chauffeur cu a resisti y no kier a supla den e mashin pa check e cantidad di alcohol den su rosea. Hassell di otro banda a elogia algun chauffeur cu tabata “designated driver” pa personanan intoxica; esaki sea tabata planea di antemano of a dicidi di tuma over durante di e salida ora cu a nota cu e chauffeur mes no tabata den un condicion pa stuur.

“A papia asina hopi biaha caba y toch chauffeurnan no ta tende. Ta uza asina hopi argumento, un tiki so mi a bebe y hasta e excuus di cultura ta wordo uza”, asina Trudy Hassell a bisa, añadiendo cu di tur manera e persona cu bebe bebida alcoholico mester compronde cu no ta cuanto el a bebe, pero ki influencia loke el a bebe tin riba su habilidad pa core auto y pa reacciona debidamente. E comisario a bisa cu Cuerpo Policial lo insisti pa hisa boetnan un tiki mas pa mira si esaki kisas lo yuda descurasha chauffeurnan pa core bao di influencia di alcohol.