OM: Lo persigui hende cu post potret cu arma riba Facebook

ORANJESTAD - Un persona (na Aruba) cu saca potret cu arma y pone riba facebook, por wordo persigui pa posesion di arma y por haya un castigo di prison di mas di un aña. Esaki ta en cuadro di combatimento di criminalidad y persecusion di arma. "Riba arma di candela nos ta actua hopi severo". Riba esaki PG Alexander van Dam a bisa cu hasta esnan cu ta haci tof riba facebook cu arma, lo haya problema. "Si bo ta kere cu bo ta tof cu bo arma riba facebook, nos sa con pa haya'bo y bo ta bay cera pa un aña of mas (15 luna) na KIA" van Dam a sigui bisa. E no ta algo na Aruba so, pero cu ta sosode rond mundo, incluyendo Merca. E yama 'Facebook Thugging', y ta castigabel pa ley. 

POTRET RIBA FACEBOOK

Pues djies pa un potret cu bo a post cu un arma. "Bo por bisa cu e ta un arma falso, of di co'i hunga. Pero ainda e ta un instrumento cu bo por usa pa menasa hende cune. Y den caso di un atraco, e victima no ta bay check si e arma ta uno falso of no. Como tal mi ta pidi tur hende, no bay post potret como un idiot riba facebook", van Dam a finalisa bisando. 

CASO INTERNACIONAL

NoticiaCla.com a haci un investigacion chikito y ta resulta cu esaki no ta nada straño, sino mas bien comun p.e. na Merca. Na Merca nan ta yamele Facebook Thugging. Esta post potret cu arma riba e red social. Pero no ta Facebook so, sino tur otro rednan social ta wordo monitoria na merca. Entre nan e departamento policial di New York, esta NYPD ta haci esaki for di 2013. Nan ta haci'e como indicativo riba violencia cu arma. "Nos a identifica e e ladronan y nos ta bay nan tras" Inspector suplente Joseph Gulotta di Brownsville a bisa. "Social media a cambia tur cos. Na 2013, polis a gara 250 arma y aresta 19 persona relaciona cu un cadena di arma. Varios di e detenidonan a pone nan potret di nan arma of nan a pose cu arma riba e.o. instagram. Na januari di aña pasa NYPD a detene un hoben di17 aña pa a post un arma falso riba potret di un polis. Na maart di e mesun aña, polis a detene un dama pasobra ela post un potret di dje cu un arma riba Facebook. "Tene cuenta kico bo ta post riba Facebook, pasobra nan por cerabo" e dama a bisa despues. Esaki pasobra Facebook Thugging ta un crimen!. 

 POLITICA DI FACEBOOK PA CU ARMA

E politica di Facebook y propaganda, ta bisa tambe cu 'Avisonan no por promove of bende e uso di arma, municion of explosivo". Si riba e pagina tin arma poni pa benta, bo no por promove e pagina aki. Si un website gelinked na bo pagina tin arma of municion pa benta, bo no por promove bo pagina. Sinembargo no ta para cu no por pone potret cu arma riba Facebook.