PG van Dam preocupa cu criminalidad pero no cu ela bay fo'i man

ORANJESTAD - "Mi lo no bisa cu e (situacion di criminalidad) a bay for di man, pero mi ta preocupa si". Cada caso di criminalidad ta uno di mas. Asina Procurador General di Aruba Alexander van Dam a reacciona na NoticiaCla.com riba e ola di criminalidad cu ta azotando nos isla. "Mi ta sinti cu e comunidad, pasobra si bo bira victima di un atraco, e ta algo cu bo no ta lubida nunca mas! E ta keda cubo pa bida largo" van Dam a sigui bisa. Como tal el a sigura cu ministerio publico ta haciendo tur cos pa preveni cu e atraconan tuma lugar. 

HIGH SEASON DI CRIMINALIDAD

Van Dam no por confirma si ta trata di un 'high season' di criminalidad pasobra e tin cu check e cifranan pa analisa si ta mas cu normal. Mes momento van Dam ta bisa tambe cu si hendenan tin e idea so caba cu nan no ta sigur mas, ken e ta pa contra aresta esey. Basa riba esey a puntra e PG si tin un plan mas specifico hinca den otro pa ataca e ola aki di criminalidad. Entre nan, si OM tin indicacion concreto cu si e grupo di 6 fugitivo Venezolano cu a huy recientemente pa posiblemente Aruba, por ta parti di e ola aki. 

FUGITIVONAN VENEZOLANO

Segun van Dam, no tin ningun indicacion conclusivo cu e 6 fugitivonan Venezolano ta na Aruba. Ademas, ora cu bin cu tipo di publicacionan asina manera cu nan a haci recientemente di e grupo ey di 6, e tin su consecuencia. "Ora cu bo haci'e bo ta spanta e comunidad y bo ta haya riba facebook un panico, aunke bo no tin cu confia facebook semper como fuente di noticia. "Pero si bo no publica e hecho (di e fugitivonan), y bo keda atraca pa e grupo aki, bo ta wordo acusa di pakico no a informa 'un rato' di e caso aki cu nan lo tabata biniendo Aruba posiblemente" van Dam a bisa. E ta semper un liña hopi fini entre e situacion. "Bo no kier spanta hende, pero bo kier tene nan alerta si". Como parti di e plan pa sigura e comunidad cu OM ta trahando, a anuncia tambe (lesa otro articulo) e inicio awe di e afpakteam cu por yuda caba cu un parti di e ola di atraco/criminalidad, preventief fouilleren y tambe e controlnan policial cu ta tumando lugar. Tambe tin e control 24/7 di warda costa riba laman y ta informa di cosnan 'straño' cu nan ta topa. "Nos ta ocupa di tur forma pa contra aresta e criminalidad" van Dam a sigui bisa. Mientras cu ta controla frontera constantemente, nos no ta un Noord Korea unda cu ta pone polis riba cada skina di caya.