Van Dam: 'Afpakteam' di Aruba activo entrante 1 di februari

ORANJESTAD - Entrante diaranson 1 februari, Aruba tambe tin su propio 'afpakteam' manera cu tin na Corsou, esta un team cu ta dedica pa 'kita' propiedad di personanan for di ken ta sospecha cu nan a haya esaki di un forma ilegal. Procurador General Alex van Dam a comparti e primicia aki cu e.o. NoticiaCla.com diamars, y bisa cu tur cos ta cla pa cuminsa. Fin di februari (1 maart) lo firma e acuerdo oficial entre e departamentonan, pero e trabou mes ta cuminsa un luna mas prome, esta mayan 1 di februari. Mientras cu gran parti di e concepto ta manera Corsou, e diferencia aki ta cu Aruba tin mas partido envolvi cu lo traha cu otro.  

E TEAM

E team ta consisti di un total di 10 persona cu ta dedica pa trata e caso aki. Entre nan tin personal di OM, Douane, FIOT (Fiscale Inlichting Opsporings Team), FIOD Hulanda, Polis, Warda Costa, MOT (Meld Punt Ongebruikelijke Transacties y RST (Recherche Samenwerkings Team). Un total di 9 departamento cu ta traha hunto pa logra e meta di 'kita cos' di hende cu nan a haya 'ilegal'. 

E PUNTO DI SALIDA

E proyecto aki tin como meta pa deshaci di practicanan ilicito di hende, y kita e percepcion di cu hendenan cu no ta traha duro, por yega na cosnan grandi toch. Segun van Dam, e tabata un frustracion grandi di hende cu si ta traha duro, mira con otronan ta logra mas, pero ilegal. "Cu e (comienso di e) afpakteam mi kier manda e señal na comunidad di Aruba, cu e asunto di gana placa cu criminalidad a caba, pasobra nos ta bin pa nan. Nos ta bay kita tur e loke ta adkeri ilegal" van Dam a sigui bisa e portal aki. A mustra cu danki na intervencion di Hulanda (ministerio di BZK), a pone fondo disponibel pa cubri gran parti di e gastonan aki. Cu e fondo por traha un team dedica pa haci e trabou di 'coi cos di hende' cu no ta di nan. "Esey ta e unico trabou cu e team lo haci. Kita cos di hende". Pa por a forma e team, a uza miembronan extra di varios departamento, cu ta bin acerca, sin cu e ta stroba e operacion actual di e teamnan existente. 

CON NAN LO OPERA

E forma con e teamnan aki lo opera, ta p.e. ora cu nan nota movecionan straño di un persona bendiendo droga. Nan ta detene e persona, investiga su propiedadnan y pone beslag riba nan. Tambe ora cu tin casonan di hende cu ta conoci cu nan lo a haya nan cosnan ilegal, auto, cas, boto, esaki lo tambe wordo tuma den beslag. Pa evita cu e propiedad aki haya un 'rabo', y por termina cerca e persona robes, lo percura pa saca tur e propiedad aki mesora for di Aruba. Cu un cas, esey lo bira mas dificil y lo procesa esaki di un diferente forma.