Douaneronan na aeropuerto a pone trabou abou

ORANJESTAD - Douaneronan staciona na aeropuerto awe mainta a pone trabou abou pa protesta contra construccion na nan pia di trabou. Presidente di e sindicato SADA Eduard Maduro a splica cu e 'buchi' di e miembronan a yena. "E construccion y locual Triple A ta bin ta haciendo cu consentimiento di e director, ta bayendo dilanti y locual nos como trahado a trece dilanti a ripara cu no ta wordo tuma na cuenta" Maduro a sigui bisa. Entre nan, e situacion cu carrentalnan ta bin 'paden' awor. 

SITUACION AEROPUERTO

Cu bendicion di director di douane segun Maduro, e carrentalnan ta bin paden, cu ta pone cu e lugar pa funciona ta bira mucho mas chikito, limitando e douaneronan den hopi sentido. "Sentido di werkuitvoering, y esaki ta cosnan cu e coleganan ta wak y e director no ta tumando na cuenta cu ne". No por a bisa te ki ora e accion aki lo a dura. E leiding a tuma over mientrastanto, tanten cu e accion sigui. Mes momento a informa cu e director kier a papia cu e trahadonan, pero nan a inform'e cu ta papia prome cu e sindicato y despues e director. 

STROBA TRABOU DI DOUANE

Ora cu papia di stroba trabou, Maduro kiermen cu tin hopi cos encera den e plan nobo di aeropuerto. Cosnan technico p.e. cu nan no ta di acuerdo cu ne. Segun Maduro, ta como si fuera Triple A kier manda bisa con mester traha. "Nan ta dicidi cuanto bali tin cu wak. Nos tur sa cuanto turista tin akinan. Nos ta un pais unda tur cos ta wordo importa, tanto legal como ilegal. Esaki ta cosnan cu mi ta sinti cu e leiding di Triple A cu bendicion di director no ta compronde". Ta premira cu kier yega na un punto unda cu kier bira un freeport parcial. Maduro ta premira hopi trafico den e aankomsthal cu ta pone cu ministernan ta yama duna opdracht pa laga hende sali. "Esey no ta loke nos a huramenta p'e. Nos a huramenta pa haci nos trabou na nos discrecion. Nos sa con pa haci nos trabou y profilering" Maduro a finalisa bisando. NoticiaCla.com a tuma contacto cu director di douane, pero ela informa cu e no por a atende aworaki sino mas laat.