Brug ta conecta dos Riu Palace cu otro

ORANJESTAD – Un brug ta fisicamente conecta dos Riu hotel cu otro na Aruba. Ora cu e extencion di Riu Palace, esta Riu Palace Antillas habri aki dos luna, e lo tin trabou pa entre 400 pa 500 cupo di trabou. Por lo menos segun minister di labor Paul Croes. E mandatario ta cita e informacion for di e represenaten legal di e hotel. Remarcable ta cu enbes di otro anja, e hotel por habri su portanan caba dia 11 di october proximo, pues cla prome cu e temporada halto. Notable ta e velocidad cu cual e trabounan a bay, cu ta mescos cu e caso di e prome Riu, cu a keda cla den apenas un anja di tempo. Mirando e trabounan, por a nota cu a uni e dos propiedadnan pa medio di dos ‘brug’ pa asina tin un unidad. Un paso logico si mira cu e operacion lo uni dos propiedad bou di un solo maneho. Remarcable ta cu e hotel ta propaganda su mes como un hotel ‘all inclusive’ exclusivamente pa adulto solamente’. E ta ofrece entre otro un gym gratis, y tres restaurant tematico, y un sin fin di actividad pa ‘adulto solamente’. E website di e hotel no ta menciona e fecha di apertura, sino ta poni solamente 'apertura pronto'.

Tabata for di februari cu e proceso di renobacion a cuminsa, mei mei di un turbulencia laboral unda cu varios grupo a sea haya pakete di retiro mientras otronan a cana e caminda legal pa nan derecho. Tur esey mientras cu e construcion a inicia y tabata andando full speed. E hotel a te hasta sobrevivi un razzia fuerte cu a resulta den varios detencion y un situacion incomodo pa varios trahado y e companianan envolvi.

E mandatario di labor, Paul Croes mientrastanto a declara cu e apertura ta ‘ representa un oportunidad grandi ‘pa e sector hotelero cu ta conoci cu tin diferente funcion cu ya caba nos mercado tin experiencia den dje,’ . E titular di labor no kier menciona hopi ainda, wardando riba e siguiente ronde di proyeccion, pero ta convenci cu e hecho cu e proyecto di RIU a keda cla prome cu tempo, esey automaticamente ta bay tin un influencia positivo riba e cifra di desempleo na Aruba.