Kiwanis Club of Aruba cu 16 bicicleta pa proyecto ‘Bikes Back 2 Life’

ORANJESTAD – Recientemente Kiwanis Club of Aruba cu hopi orguyo y entusiasmo a entrega un total di 16 bicicleta  cu su proyecto comunitario ‘Bikes Back 2 Life”. E obhetivo ta pa colecta for di comunidad bicicletanan cu no ta den uzo mas, drecha nan na e punto cu nan ta safe y despues regala nan bek na muchanan di menos recurso. Intencion di e organisacion local ta pa realisa e accion aki cada tres luna; kiermen cuater bes pa aña, y enfoca riba muchanan entre 5 pa 15 aña den diferente bario.

‘BB2L’ ta un proyecto masha bunita paso ta duna un bida nobo na un obheto cu ta trece hopi alegria na e mucha cu tin’e, pero tambe pasobra comunidad ta participa activamente. Kiwanis Club of Aruba ta haci un invitacion na un y tur pa cuminsa tira bista riba e bicicleta ey cu tin rond di cas, si ta haci uzo di dje of e t’ey ta coy stof y frusto so. Si bo no tin un bicicleta mes na cas tambe bo por yuda dor di conta famia, amigo of bisiña di e proyecto aki pa wak si nan si por contribui.

Na final, Kiwanis Club of Aruba ta busca pa tur hende ta contento. Donadornan lo ta contento di por a deshaci di e miho manera posibel di algo cu nan no ta uza mas; nos medio ambiente lo ta contento pasobra tin menos sushi pa atende cune; y esnan cu haya e bicicleta y nan famia lo ta contento pasobra nan tin un bicileta ‘nobo’ pa goza di dje, ademas di ta activo na un manera sano y por ta, te hasta haya interes den un deporte nobo.

‘Bike Back 2 Life’ ta posibel danki na e valioso cooperacion di empresanan local Tri Bike y Radio Shack cu ta bay asisti Kiwanis Club of Aruba den e evaluacion, seleccion y reparacion di e bicicletanan cu por wordo renoba. Tri Bike y Radio Shack tambe ta bay ta encarga di haci un inspeccion final di e bicicletanan pa declara nan safe pa subi caminda. For di awor caba Kiwanis Club of Aruba ta gradici gerencia y personal di Tri Bike y Radio Shack pa acepta di forma parti di e proyecto aki. San Fuego Cycling Club tambe ta contribui na e proyecto aki door di duna e muchanan cu ta ricibi nan bicicleta tips valioso riba coremento di baiskel, mantencion y tambe seguridad den trafico.

Personanan cu kier contribui cu e proyecto ‘BB2L’ por tuma contacto cu representantenan di Kiwanis Club of Aruba na number di cellular 592-6248.  Di e manera aki ta coordina pa un persona bin busca e bicicleta of na unda por trec’e. E club ta ansioso di wak e generosidad di nos comunidad manifesta pa asina por haci hopi mucha contento.