Prensa internacional critico riba trahe nacional Miss Aruba

MANILA - E dicho fama ta fama. Mal fama tambe ta fama, ta bin na mente den e caso di e raportahe riba e 'trahe nacional' di Miss Aruba 2017 Charlene Leslie durante e certamen di Miss Universo. Un dia despues di e certamen na Filipinas, ainda prensa Filipino tabata papiando di e trahenan nacional, y unda cu Aruba tambe ta keda menciona. Un otro medio algun dia prome, no tabata mucho 'positivo', aunke cu nan a haci e mencion si. Y un otro (Cosmopolitan) ta elogia e trahe grandemente. Charlene Leslie, Aruba su representante a scoge pa personifica Aruba su atleta favorito Sara Quita Offringa, completo cu peluca y bela como parti di su 'trahe'. Hecho ta, cu ela hala atencion internacional suficiente pa tin mencion di dje.

PRENSA AUSTRALIANO NEGATIVO

E medio 'Daily Telegraph' di Australia no tabatin palabra positivo y mas bien a referi na e intento di Leslie, como 'un vinculo cultural dudoso'. "Ora cu bo Google Aruba, un isla Hulandes chikito dilanti costa di Venezuela, e prome vinculo cu ta aparece ta 'E miho destinacion vacacional', e medio ta cuminsa na bisa. 'Hende blanco ta gusta tuma parti na deporte acuatico durante nan vacacion, pues mi ta kere cu ta p'esey 'pober' Charlene Leslie ta pega na un bela di windsurf' e medio ta sigui bisa. A califica e acto aki un 3 (di un 10). ' E cos ey (e bela) ta mustra hopi pisa. Pero e ta bisti sapato roos cu ta asina mahos, cu nan mester ta comfortabel' e medio ta sigui raporta. Pues un raportahe totalmente negativo y den un forma menosprecia di nos beyesa  di Aruba. 

BUSINESS WORLD ONLINE MANILA

Mientrastanto, e portal 'Business World Online' di Manila, a djies haci mencion di e hecho cu Leslie a opta pa bisti un 'outfit di windsurf' completo cu e bela pa defende e isla su deporte favorito cu ta windsurf. "Hala kita di dje, si bo no ta windsurf… Aruba", ta loke e anuncio tabata riba e anochi di e presentacion. E portal a meramente cita esaki den su raportahe. 

COSMOPOLITAN

Den Cosmopolitan, nan ta mustra cu nan ta contento cu e trahe, y cu mester 'duna Miss Aruba un tiara of algo, pasobra ela logra bisti como un windsurf y a logra su meta tambe'. E comentario di e revista aki ta mustra cu e escritor mes no gusta deporte acuatico debi na mal experiencia personal, pero cu si e ta obsesiona cu e trahe di miss Aruba. 

ARUBA TA HAYA PUBLICIDAD

Pa malo of bon cu e por ta, si analisa cu tabatin 86 candidato, y den ambos medio, a scoge Aruba pa haci mencion, por deduci cu ela haci un impacto suficiente pa haya e atencion internacional. Charlene Leslie mientrastanto ta bolbe Aruba diamars anochi 10'or.