SAC ta habri caminda pa Grupo Uni pero condiciona

ORANJESTAD – Condiciona pa 4 punto specifico, Stichting Arubaanse Carnaval (SAC) ta habri lugar pa 7 comisario drenta nan fundacion, y ta pone esaki disponibel na miembronan di e grupo Uni di carnaval y representantenan di gobierno. Cu e acto aki, SAC ta duna oido na e peticion di minister di Cultura Otmar Oduber door di cambia su structura interno pa por acomoda e grupo Uni y gobierno. Pero hunto cu e puntonan menciona, SAC ta mustra su disgusto pa e forma ‘deningrante’ cu e la wordo trata siman pasa diaranson durante e encuentro cu e mandatario.

Den un carta di 4 pagina (lesa e carta aki) , e abogado ta cuminsa na splica cu ta considera e forma con SAC su miembronan a wordo trata, como humiyante y menasante durante dicho reunion. A sigui pa mustra un trayectoria di corespondencia entre e gruponan uni y SAC unda cu segun SAC na varios instante e grupo uni tabata robes e incorecto. For di reclama falta di ayudo financiero, te na reclamonan bashi haci den direccion di SAC. Reunionan convoca pa SAC pa cu e gruponan uni, nunca a tuma lugar pasobra grupo uni a rechasa esakinan.

Un punto importante pa SAC ta e hecho cu nan a compromete nan mes cu carnaval 61, y cualkier impedimento di esaki, pa medio di e posibel accion di gobierno, lo por ta funesto pa SAC y como tal lo responsabilisa gobierno pa e consecuencianan di esaki.

Pero e punto mas importante cu e abogado ta ilustra segun SAC, ta e historia di SAC di organisa carnaval pa Aruba pa mas di 60 anja. “No por djies hala SAC un banda den un caso asina. Semper SAC a organisa carnaval di Aruba y a haci esaki cu aprobacion di comunidad, sin pidi un sen preto a cambio” e abogado a sigui bisa na nomber di SAC.

Na final, SAC ta habri caminda pa 7 comisario ‘nobo’, pa asina completa e cantidad di comisario na 20. Tin lugar pa 21 comisario segun statuut, pues segun e abogado, tin lugar pa e 7 personanan aki.

Loke si e abogado ta remarca ta cu e 7 personanan aki cu drenta, ta drenta como comisario completo, cu tur su deber y beneficionan. Cada miembro cu ta representa un grupo, mester bin cu su statutonan propio. Nan ta wordo responsabilisa si dado caso SAC sufri perdida financiero. Ningun comisario lo wordo recompensa financieramente pasobra esey ta e regla di tur comisario, trahando a base voluntario. Y finalmente, tur comisario tin cu eherce trabounan manera ta wordo delega na nan, unabes miembro di SAC.

Den combersacion cu presidente di SAC, Tecla Kelly, e la splica NoticiaCla.com mes momento cu no por ta asina cu e 7 miembronan ta drenta y ta asumi un tarea den e directiva diario di e fundacion. “Nan mester cana nan caminda mescos cu tur hende. Despues di algun anja nan por bin na remarke pa un funcion asina” Kelly a bisa. A mustra cu den pasado e grupo uni a purba esey, pero cos ‘no ta bay asina’ Kelly a finalisa bisando.

Minister Otmar Oduber a informa diamars atardi laat cu diaranson mainta e lo reacciona riba e carta di abogado y duna su comentario publicamente di kico e siguiente paso ta pa por resolve e asunto aki.