Filanan hopi largo pa number di auto ta sigui problematico

ORANJESTAD - Filanan hopi largo na departamento di impuesto a continua diabierna mainta, mientras cu e deadline di pago (31 di januari ) ta yegando. Cos tabata asina 'hot', cu dado momento mester a pidi ayudo di personal di ambulance pa un persona cu a bira malo den e edificio, durante cu e tabata warda. Pafo tabatin hopi critica di hende cu mester a para oranan largo den solo, sin cu tin un tent pa tapa pa e solo. Riba rednan social manera Facebook, e noticia cu mas a domina y cu potret, tabata e situacion na departamento di belasting di e rij largo pafo. 

SITUACION UN DI A ANTERIOR

Ayera caba e porta a raporta riba e filanan hopi largo pa paga number di auto primordialmente. Vocero di e departamento Meverly Romano a confirma ayera pa e portal aki cu e situacion ta basta fastioso ora cu tin rij largo, pasobra no por yuda tur hende, y numbernan ta caba y hendenan no ta gusta. Pero mes momento a mustra cu ta pa seguridad ta tuma cierto paso, manera limita number pa por tin control riba e cantidad di persona y e edificio.

FECHA DI VENCEMENTO TA CERCA

E fecha di vencemento di e prome (di dos) termino di pago ta yegando (31 di januari) y ainda masha hopi hende no a paga nan prome termino. Esey a pone cu aworaki e liñanan pa paga number, a bira di tal forma cu (manera foto ta indica), ta pasa bay pafo di e edificio principal na Camacuri. Pero no ta ey so, sino tur otro posibilidad ta birando un problema. Tur hulpsbestuurkantoor, MFA ta yen yen. 

TEMPO DI ESPERA LARGO

Romano a confirma pa e portal aki cu e tempo di warda den liña ta varia entre 3 pa 4 ora y esey ta hopi. Hendenan cu tabata ranca number p.e 9or, tabata wordo yuda den careda di 12'or of mas laat. 

PAGA ONLINE

E pregunta di dia tabata con ta haci cu esnan cu a paga online, pero no ta haya nan sticker. "Esnan cu paga online, tin cu tene cuenta cu ta dura 5 dia di trabou pa e pago wordo procesa" Romano a bisa. Unabes cu esey tuma lugar, e persona por bay cu su comprobante di banco pa e edificio pafo di esun principal na Camacuri, y haya su sticker. Tambe tin keho di hendenan cu ta bisa cu no tin suficiente hende pa yuda, pero e situacion ta asina cu tin mucho hende hunto, pasobra nan ta laat. Ta tuma number pero e numbernan ta caba liher, pasobra a mira cu si duna mucho mas number, e caheranan no ta caba nan horario normal. A limita como tal, e cantidad di number of ta stop di duna number mas tempran. Fotonan cortesia Lyonel Dirkz.