Impasse entre Hilton Aruba y AHATA ta continua

PALM BEACH - "AHATA (Aruba Hotel & Tourism Association) tin speransa cu Hilton Aruba Caribbean Resort lo bolbe como miembro (di AHATA) den e futuro cercano". Asina CEO di e gremio hotelero esta Jim Hepple a reacciona den un comentario breve pa NoticiaCla.com riba e impasse cu tin entre e cadena hotelero y AHATA. Awe ta un siman pasa, cu durante e asamblea ultimo Hilton a (bolbe) retira di e gremio y directiva hotelero. Prome biaha tabata na september aña pasa. Hilton ta cita diferencia di opinion pa loke ta e maneho di e directiva di AHATA. 

E PROBLEMA

Manera ta conoci, for di aña pasa september e gerente general di e tempo ey di Hilton Aruba, Olivier Maumaire, a retira como miembro di directiva di AHATA. E cadena hotelero mes momento a para nan miembrecia tambe. Como motibo duna, representante di e doñonan di e hotel Aruba Growth Fund (AGF) Rene Kan a confirma pa e portal aki, falta di progreso den e gremio hotelero pa motibo di actuacion incorecto di e directiva. Entre e puntonan menciona, ta papia di e.o. e impasse constante entre gobierno y AHATA aña pasa riba tema di e.o. All Inclusive, ley laboral y beach policy como algun di e puntonan. Segun Kan, partidonan no tabata logra nada y e 'pleito' tabata costa solamente placa innecesario. Ademas Kan a mustra cu e forma di opera den e directiva no tabata nada democratico. Informacion di e reunion(nan) tabata sali pa prensa den un forma repentino y asina tin un lista mas di cos cu tabata incorecto. Y finalmente, e grandura di e directiva (15 miembro) tambe tabata un problema. Segun Kan, un directiva di 15 miembro no ta solamente mucho grandi, pero e constelacion tambe tabata un problema. "Pakico e miembro mester ta semper un gerente general. Pakico no pone tambe un persona cu otro funcion y expertisio? Of un hende muher?" Kan a sigui bisa. 

COMPROMISO ENTRE AHATA Y HILTON

Despues di e ruptura inicial na september di aña pasa, a sigui un bay bin di corespondencia entre AHATA y Hilton su doñonan, unda cu na cierto momento, AHATA lo a priminti Hilton cambionan manera cu nan a solicita. Entre nan, reduccion di 15 miembro pa 9, pero cu esaki mester a bay di forma di votacion pa haya aprobacion. E reunion ey (asamblea) a tuma lugar siman pasa diabierna, unda cu pa sorpresa di Hilton, nada no a cambia. De hecho, tabatin e percepcion cu ningun hende no tabata na altura di ningun cambio. Esey a pone cu na e momento ey, representante di AGF, esta Kan, a anuncia cu Hilton ta (bolbe) retira di AHATA mirando cu e no ta mira seriedad y cambio manera cu a wordo priminti na e cadena hotelero. Esey ta nifica cu AHATA ta sigui den 2017 sin Hilton como miembro. 

REACCION DI AHATA

E portal aki a sigui e desaroyo y combersa cu tanto Kan y a busca reaccion di AHATA den e caso aki. Den caso di Hepple, a puntra e CEO riba tur e puntonan cu Hilton a trece dilanti y pa trece clarificacion di nan banda.  Pero mientras cu AHATA enberdad a reacciona, e tabata hopi cortico y no a bay den detayes. Hepple (manera indica anteriormente), de hecho a tene su comentario corto " AHATA ta lamenta e desicion di e doñonan di Hilton pa un biaha mas retira di AHATA", Hepple a cuminsa na bisa. "AHATA lo continua su enfoke pa representa e interes di e industria y su miembronan y tin speransa cu Hilton lo bolbe como miembro den un futuro hopi cercano".